ଡବଲିନ୍,୭।୬: ଆୟର୍ଲାଣ୍ଡର ମିକ୍ସଡ୍ ମାର୍ଶାଲ ଆର୍ଟ (ଏମ୍ଏମ୍ଏ) ଖେଳାଳି କନୋର ମ୍ୟାକ୍ ଗ୍ରେଗର ପୁଣି ଥରେ ଅବସର ଘୋଷଣା କରିଛନ୍ତି। ଗତ ୪ ବର୍ଷ ମଧ୍ୟରେ ସେ ତୃତୀୟଥର ପାଇଁ ଅବସର ଘୋଷଣା କରିଛନ୍ତି। ସେ ଏନେଇ ଟୁଇଟ୍ କରି ସୂଚନା ଦେଇଛନ୍ତି। ମା’ଙ୍କ ସହିତ ଏକ ପୁରୁଣା ଫଟୋ ଟୁଇଟ୍ କରି ଫାଇଟିଂରୁ ସନ୍ନ୍ୟାସ ନେବାକୁ ନିଷ୍ପତ୍ତି ନେଇଛି ବୋଲି ସେ କହିଛନ୍ତି। ଏମ୍ଏମ୍ଏରେ ସେ ସବୁଠାରୁ ଲୋକପ୍ରିୟ ଖେଳାଳି ବିବେଚିତ ହୋଇଛନ୍ତି। ସେ ୟୁଏଫ୍ସିର ଭିନ୍ନ ଭିନ୍ନ ବର୍ଗରେ (ଲାଇଟ୍ ଓ ଫିଦରଓ୍ବେଟ)ରେ ବିଶ୍ୱ ଚାମ୍ପିୟନ ହେବାର ଗୌରବ ଅର୍ଜନ କରିଛନ୍ତି। ଗତବର୍ଷ ମାର୍ଚ୍ଚରେ ସେ ଅବସର ଘୋଷଣା କରିଥିଲେ। ତେବେ ସେ ଗତ ଜାନୁୟାରୀରେ ରିଙ୍ଗ୍କୁ ପ୍ରତ୍ୟାବର୍ତ୍ତନ କରି ସମସ୍ତଙ୍କୁ ଚକିତ କରିଥିଲେ ଓ ଲସ୍ ଭେଗାସ୍ରେ ସେ ଆମେରିକୀୟ ଫାଇଟର ଡୋନାଲ୍ଡ ସେରୋନଙ୍କୁ ମାତ୍ର ୪୦ ସେକେଣ୍ଡରେ ନକ୍ଆଉଟ୍ କରିଥିଲେ।
୨୦୧୬ରେ ସେ ପ୍ରଥମଥର ପାଇଁ ଅବସର ଘୋଷଣା କରି ସବୁ ପ୍ରଶଂସକଙ୍କୁ ଚକିତ କରିଥିଲେ। ଅବସରରୁ କେବଳ ମ୍ୟାକ୍ଗ୍ରେଗର ପ୍ରତ୍ୟାବର୍ତ୍ତନ କରିନାହାନ୍ତି। ପୂର୍ବରୁ ମହମ୍ମଦ ଅଲି, ଫ୍ଲଏଡ ମେଓ୍ବେଦର, ଟିଟୋ ଓରଟିଜ୍ ଓ ଚକ୍ ଲିଡେଲଙ୍କ ଭଳି ତାରକା ବକ୍ସର ଓ ଏମ୍ଏମ୍ଏ ଚାମ୍ପିୟନ ଅବସରରୁ ପ୍ରତ୍ୟାବର୍ତ୍ତନ କରିଥିଲେ।
