ହାଇଦ୍ରାବାଦ୍,୧୬।୯: ଗୁରୁବାର ସକାଳେ ରେଳ ଧାରଣରେ ଜଣେ ଯୁବକଙ୍କ ଖଣ୍ଡ ବିଖଣ୍ଡିତ ମୃତଦେହ ମିଳିଛି। ହାଇଦ୍ରାବାଦ୍ ଠାରୁ ପ୍ରାୟ ୧୩୦ କିମି ଦୂରରେ ମିଳିଥିବା ମୃତଦେହଟି ୬ ବର୍ଷୀୟା ନାବାଳିକାଙ୍କ ବଳାତ୍କାର ଓ ହତ୍ୟା ମାମଲାରେ ଫେରାର ଥିବା ଅଭିଯୁକ୍ତ ପାଲାକୋଣ୍ଡା ରାଜୁଙ୍କର ବୋଲି ପୋଲିସ ପକ୍ଷରୁ କୁହାଯାଇଛି। କାରଣ ପାଲାକୋଣ୍ଡାଙ୍କ ହାତରେ ଥିବା ଟାଟୁ ମୃତଦେହରେ ଥିବା ଟାଟୁ ମେଳ ଖାଉଛି। ପ୍ରାଥମିକ ତଦନ୍ତରୁ ଏହା ଏକ ଆତ୍ମହତ୍ୟା ବୋଲି ଜଣାପଡ଼ୁଥିବା ହାଇଦ୍ରାବାଦ୍ ପୋଲିସ କମିଶନର ଅଞ୍ଜାନି କୁମାର କହିଛନ୍ତି।
ଗତ ଗୁରୁବାର (ସେପ୍ଟେମ୍ବର ୯)ସନ୍ଧ୍ୟାରେ ୬ ବର୍ଷୀୟା ଝିଅ ସିଙ୍ଗାରେନି କଲୋନିସ୍ଥିତ ଘରୁ ନିଖୋଜ ହୋଇଯାଇଥିଲେ। ସେହି ଦିନ ପଡ଼ୋଶୀଙ୍କ ଘରୁ ମିଳିଥିଲା କୁନି ଝିଅର ମୃତଦେହ। ବ୍ୟବଚ୍ଛେଦ ରିପୋର୍ଟରୁ ହତ୍ୟା ପୂର୍ବରୁ ପୀଡ଼ିତାଙ୍କ ସହ ବଳାତ୍କାର ହୋଇଥିବା ଜଣାପଡ଼ିଥିଲା। ତା’ ପରଠୁ ପୋଲିସ ଅଭିଯୁକ୍ତ ପାଲାକୋଣ୍ଡାଙ୍କୁ ଧରିବା ପାଇଁ ବିଭିନ୍ନ ସ୍ଥାନ ଚଢ଼ାଉ କରି ବିଫଳ ହୋଇଥିଲା। ଏପରି କି ଅଭିଯୁକ୍ତଙ୍କୁ ଧରିବା ପାଇଁ ୧୦ ଲକ୍ଷ ଟଙ୍କାର ପୁରସ୍କାର ଘୋଷଣା କରିଥିଲା ହାଇଦ୍ରାବାଦ ପୋଲିସ। ଏପରି କି ଜଣେ ମନ୍ତ୍ରୀ ବଳାତ୍କାରୀଙ୍କୁ ଧରିବା ପରେ ଏନ୍କାଉଣ୍ଟର କରାଯିବ ବୋଲି ଟୁଇଟ୍ କରିଥିଲେ।
ରେଳ ଧାରଣରୁ ମିଳିଥିବା ମୃତଦେହର ଫଟୋ ତେଲାଙ୍ଗାନା ପୋଲିସ ପକ୍ଷରୁ ଟୁଇଟରରେ ଶେୟାର କରାଯାଇଛି। ଏ ପର୍ଯ୍ୟନ୍ତ ମୃତକଙ୍କ ପରିଚୟ ଜଣାପଡ଼ି ନାହିଁ। ମୃତଦେହଟି ବଳାତ୍କାର ଓ ହତ୍ୟା ଅଭିଯୁକ୍ତ ପାଲାକୋଣ୍ଡାଙ୍କ(୩୦)ର ହୋଇଥାଇପାରେ। ମୃତକଙ୍କ ହାତରେ ଥିବା ଟାଟୁ ଓ ତାଙ୍କ ହେୟାର ଷ୍ଟାଇଲ କାରଣରୁ ଆମେ ସନ୍ଦେହ କରୁଛି। ତେବେ ଫିଙ୍ଗରପ୍ରିଣ୍ଟ ଆନାଲିସିସ୍ ପରେ ସବୁ କିଛି ସ୍ପଷ୍ଟ ହୋଇଯିବ ବୋଲି ହାଇଦ୍ରାବାଦ୍ ପୋଲିସ ମୁଖ୍ୟ କହିଛନ୍ତି।
