ନୂଆଦିଲ୍ଲୀ,୨୦।୮: ମଧ୍ୟପ୍ରଦେଶର ମୁଖ୍ୟମନ୍ତ୍ରୀ କମଲନାଥଙ୍କ ଭଣଜା ରତୁଲ ପୁରୀଙ୍କୁ ମଙ୍ଗଳବାର ସକାଳେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରିଛି। ୩୫୪ କୋଟି ଟଙ୍କାର ବ୍ୟାଙ୍କ ଦୁର୍ନୀତି ମାମଲାରେ ରତୁଲଙ୍କୁ ଗିରଫ କରାଯାଇଥିବା ସୂଚନା ମିଳିଛି। ଶନିବାର ସିବିଆଇ ପକ୍ଷରୁ ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆର ୩୫୪କୋଟି ଟଙ୍କାର ଠକେଇ ମାମଲାରେ ରତୁଲଙ୍କ ନାଁରେ ମାମଲା ରୁଜୁ କରାଯାଇଥିଲା। ଏଥିସହ ତାଙ୍କ ପିତା ପ୍ରବନ୍ଧ ନିର୍ଦ୍ଦେଶକ ଦିପକ ପୁରୀ, ମା’ ନୀତା ପୁରୀ, ସଞ୍ଜୟ ଜୈନ, ଓ ବିନିତ ଶର୍ମାଙ୍କ ବିରୋଧରେ ଆପରାଧିକ ଷଡଯନ୍ତ୍ର, ଜାଲିଆତି, ଠକେଇ ଓ ଭ୍ରଷ୍ଟାଚାର ମାମଲା ରୁଜୁ କରାଯାଇଥିଲା। କେବଳ ସେତିକି ନୁହେଁ ରବିବାର ଏହି ଅଭିଯୁକ୍ତଙ୍କ ବାସଭବନ ଓ କାର୍ଯ୍ୟାଳୟ ସମେତ ୬ଟି ସ୍ଥାନରେ ସିବିଆଇ ପକ୍ଷରୁ ଚଢ଼ାଉ କରାଯାଇଥିଲା।
