ଭୁବନେଶ୍ୱର,୨୬ା୩(ବ୍ୟୁରୋ): କରୋନା ଭୂତାଣୁ ଦିନକୁ ଦିନ ଭୟଙ୍କର ରୂପ ନେବାରେ ଲାଗିଛି। ଓଡ଼ିଶାରେ ତୃତୀୟ ପଜିଟିଭ ରୋଗୀ ଚିହ୍ନଟ ପରେ ରାଜ୍ୟବାସୀ ଭୟଭୀତ ହୋଇପଡ଼ିଛନ୍ତି। ଏଭଳି ଏକ ଘଡ଼ିସନ୍ଧି ମୁହୂର୍ତ୍ତରେ ଦେଶ ଏବଂ ରାଜ୍ୟବାସୀ ସଂଘର୍ଷ କରୁଥିବାବେଳେ ମୁଖ୍ୟମନ୍ତ୍ରୀ ବିଭିନ୍ନ ସଂସ୍ଥା ଏବଂ ଲୋକଙ୍କୁ ଅର୍ଥ ଦାନ କରିବାକୁ କୁହାଯାଇଛି। ଏହାପରେ ବିଭିନ୍ନ ସଂସ୍ଥା, କମ୍ପାନୀ, ଅଭିନେତା, ନେତା ଓ ମନ୍ତ୍ରୀମାନଙ୍କ ପକ୍ଷରୁ ସରକାରଙ୍କୁ ସହାୟତାର ହାତ ବଢ଼ାଇଛନ୍ତି। ଏହି କ୍ଷେତ୍ରରେ ଅଭିନେତ୍ରୀ ରାନୀ ପଣ୍ଡା ମଧ୍ୟ ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ଶୁକ୍ରବାର ୫୦ ହଜାର ଟଙ୍କା ଦାନ କରିଛନ୍ତି। ଏ ନେଇ ରାନୀ ପଣ୍ଡା ଏକ ଭିଡିଓ ରେକର୍ଡ କରି ନିଜ ସୋସିଆଲ ମିଡିଆରେ ସେୟାର କରିଛନ୍ତି। ସେ କହିଛନ୍ତି, ଏଭଳି ସମୟରେ କରୋନା ବିରୋଧରେ ଆମେ ଲଢ଼ିବା। ସରକାରଙ୍କ ଲକଡାଉନ ନିୟମ ମାନି ଘରେ ରହି ଏହି ମହାମାରୀ ସହ ସଂଘର୍ଷ କରିବା। ସବୁବେଳେ ସାବୁନରେ ହାତ ଧୋଇବା। ବାହାରକୁ ଯାଉଥିଲେ ସାମାଜିକ ଦୂରତ୍ୱ ବଜାୟ ରଖିବା। ସରକାରଙ୍କ ରିଲିଫ ପାଣ୍ଠିକୁ କିଛିକିଛି ଅର୍ଥ ଦାନ କରି ଗରିବ, ଅସହାୟ ପେଟକୁ ଦାନା ଦେବାରେ ସାମିଲ ହେବା। ଏହାସହ ରାଣୀ ଅନ୍ୟମାନଙ୍କୁ ମଧ୍ୟ ଅର୍ଥ ଦାନ କରିବାକୁ ପରାମର୍ଶ ଦେଇଛନ୍ତି।
