ଲାଇଭ୍ ମ୍ୟୁଜିକ୍ ଶୋ’ ପୃଥିବୀ ପାଇଁ କ୍ଷତିକାରକ ବୋଲି ନିକଟରେ କରାଯାଇଥିବା ଏକ ଗବେଷଣାରୁ ଜଣାପଡିଛି। କାରଣ ଏହି ଲାଇଭ୍ ମ୍ୟୁଜିକ ଶୋ’ରୁ କେବଳ ବ୍ରିଟେନରେ ପ୍ରତିବର୍ଷ ୪.୦୫ ଟନ୍ ଗ୍ରୀନ୍ ହାଉସ୍ ଗ୍ୟାସ ନିର୍ଗତ ହେଉଛି। ଏହି ଗ୍ୟାସ୍ ପୃଥିବୀର ତାପମାତ୍ରା ବୃଦ୍ଧି ବା ଗ୍ଲୋବାଲ ଓ୍ବାର୍ମିଂ ପାଇଁ ସବୁଠାରୁ ଅଧିକ ଦାୟୀ ବୋଲି କୁହାଯାଇଛି। ଏବେ ମଞ୍ଚେଷ୍ଟର ୟୁନିଭର୍ସିଟିର ବୈଜ୍ଞାନିକମାନେ ଏହାକୁ ରୋକିବା ପାଇଁ ଗବେଷଣା ଆରମ୍ଭ କରିଛନ୍ତି। ଏହି ଗବେଷଣା ମାଧ୍ୟମରେ ସେ ପପ୍ ଶୋ’ ଓ ମ୍ୟୁଜିକ ବ୍ୟାଣ୍ଡର ଲାଇଭ୍ ଶୋ’ କିପରି ପରିବେଶ ଉପରେ କୁପ୍ରଭାବ ନ ପକାଇବ ସେ ନେଇ ଗବେଷଣା କରୁଛନ୍ତି। ବିଶେଷ କରି ଏହିସବୁ କାର୍ଯ୍ୟକ୍ରମରୁ ଯେଉଁ ପରିମାଣରେ କାର୍ବନଡାଇଅକ୍ସାଇଡ୍ ବାହାରୁଛି ତାହାକୁ କମ୍ କରିବାକୁ ଚେଷ୍ଟା କରାଯିବ। ଗବେଷକଙ୍କ କହିବା କଥା ହେଲା ଏଥିରେ ଲାଇଟ୍ ଓ ସାଉଣ୍ଡ ପାଇଁ ବ୍ୟବହୃତ ମେଶିନରୁ ବହୁ ପରିମାଣରେ କାର୍ବନଡାଇଅକ୍ସାଇଡ୍ ନିର୍ଗତ ହୋଇଥାଏ। ଏହାସହ ମ୍ୟୁଜିକ ଶୋ’ର ଉପକରଣକୁ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ନେବାକୁ ମଧ୍ୟ ଅଧିକ ଗାଡି ବ୍ୟବହାର କରାଯାଇଥାଏ। ଯାହା ଫଳରେ ପରିବେଶରେ କାର୍ବନଡାଇଅକ୍ସାଇଡ୍ ଆଉ କିଛି ପରିମାଣରେ ମିଶି ଯାଇଥାଏ। ଏହାସହ ଏଥିପାଇଁ ବ୍ୟବହୃତ ହେଉଥିବା ଆଲୋକ ବା ବିଜୁଳୀ ମଧ୍ୟ ପରିବେଶ ପାଇଁ କ୍ଷତିକାରକ ବୋଲି ଗବେଷକମାନେ କହିଛନ୍ତି।
