ବାରିପଦା ଅଫିସ,୧୬ା୫: ମୟୂରଭଞ୍ଜ ଜିଲାରେ ଶନିବାର ଆଉ ୨ କରୋନା ପଜିଟିଭ ଚିହ୍ନଟ ହୋଇଛନ୍ତି। ଜଣେ କପ୍ତିପଦା ବ୍ଳକ ପିଙ୍ଗୁ ଗ୍ରାମର ୧୬ ବର୍ଷର ବାଳକ ହୋଇଥିବା ବେଳେ ଅନ୍ୟ ଜଣେ ବାରିପଦା ପୌରପରିଷଦ ତକତପୁରର ୧୫ ବର୍ଷର ବାଳକ। ଉଭୟଙ୍କୁ ଚିକିତ୍ସା ପାଇଁ କଟକ କୋଭିଡ଼ ହସ୍ପିଟାଲକୁ ପଠାଯାଇଛି। ପିଙ୍ଗୁ ଗ୍ରାମର ଆକ୍ରାନ୍ତ ସୁରଟ ଫେରନ୍ତା ହୋଇଥିବା ବେଳେ ତକତପୁର ଆକ୍ରାନ୍ତ ପଶ୍ଚିମବଙ୍ଗ ଫେରନ୍ତା ବୋଲି ଜଣାପଡ଼ିଛି।
ତକତପୁର ଅଞ୍ଚଳର ଯୁବକ ପଶ୍ଚିମବଙ୍ଗରେ ରହି ପାଠ ପଢ଼ୁଥିଲେ। ଗତ ୯ ତାରିଖରେ ସେ ଅନ୍ୟ ୮ ଜଣଙ୍କ ସହ କୋଲକାତାରୁ ଓଡ଼ିଶାକୁ ଏକ ଗାଡ଼ିରେ ଆସିଥିଲେ। ତାଙ୍କ ସହ ଅନ୍ୟ ୨ ଜଣ ବାରିପଦାରେ ଓହ୍ଲାଇଥିବା ବେଳେ ଅନ୍ୟମାନେ ଅନ୍ୟ ଜିଲାକୁ ଯାଇଥିଲେ। ତେବେ ବାରିପଦାରେ ଓହ୍ଲାଇଥିବା ୩ ଜଣଯାକ କ୍ୱାରାଣ୍ଟାଇନରେ ରହୁଥିଲା। ସେଠାରୁ ସମସ୍ତଙ୍କ ସ୍ବାବ ପରୀକ୍ଷା ପାଇଁ ପଠାଯାଇଥିବା ବେଳେ ଶନିବାର ସକାଳେ କେବଳ ଜଣଙ୍କର ପଜିଟିଭି ବାହାରିଥିଲା। ଉଭୟ ରାଜ୍ୟ ବାହାରୁ ଆସିବା ପରେ କ୍ୱାରାଣ୍ଟାଇନ କେନ୍ଦ୍ରରେ ଥିବାରୁ କେହି ଭୟଭୀତ ନ ହେବା ପାଇଁ ଜିଲାପାଳ ବୀନିତ ଭରଦ୍ୱାଜ ପ୍ରକାଶ କରିଛନ୍ତି।
ପ୍ରକାଶ ଯେ, ଜିଲାରେ ପୂର୍ବରୁ ୯ ଜଣ କରୋନା ପଜିଟିଭି ଚିହ୍ନଟ ହୋଇଥିବା ବେଳେ ଶନିବାର ନୂଆ ୨ ଜଣଙ୍କୁ ମିଶାଇ ଜିଲାରେ ମୋଟ ଆକ୍ରାନ୍ତଙ୍କ ସଂଖ୍ୟା ୧୧କୁ ବୁଦ୍ଧି ପାଇଛି।
