କଳିଙ୍ଗନଗର, ୧୫।୭ (ଡି.ଏନ୍.ଏ.)-ଯାଜପୁର ଜିଲା ଯାଜପୁରରୋଡ ଥାନା ଦାନଗଦି ଫାଣ୍ଡି ଅଧୀନ ଛତରା ଗ୍ରାମରେ ବୁଧବାର ସନ୍ଧ୍ୟାରେ ଏକ ଲୋମହର୍ଷଣକାରୀ ଘଟଣା ଘଟିଛି। ଗୁଣିଗାରେଡ଼ି ସନ୍ଦେହରେ ଛତରା ଗ୍ରାମର ଯୁବକ କାର୍ତ୍ତିକ କେରେଇ(୨୪) ଏକ ଟାଙ୍ଗିଆରେ ସେହି ଗ୍ରାମର ଜଣେ ବୃଦ୍ଧା ନନ୍ଦିନୀ ପୂର୍ତ୍ତି (୬୦)ଙ୍କ ମୁଣ୍ଡ କାଟି ହତ୍ୟା କରିଛନ୍ତି। ଏହାପରେ କଟାମୁଣ୍ଡ ଧରି ରାସ୍ତାରେ ବୁଲୁଥିବା ସମୟରେ ଡୁବୁରୀ ନିକଟରୁ ଦାନଗଦି ଫାଣ୍ଡି ପୋଲିସ ତାଙ୍କୁ କାବୁ କରିଛି। ଏହି ଘଟଣା ଜିଲା ସାରା ଚହଳ ପକାଇଛି। ରିପୋର୍ଟ ଲେଖାହେବା ପର୍ଯ୍ୟନ୍ତ ଥାନାରେ ଏ ନେଇ କୌଣସି ମାମଲା ରୁଜୁ ହୋଇନାହିଁ।
ପ୍ରକାଶ ଯେ, ନନ୍ଦିନୀ ଝଡ଼ାଫୁଙ୍କା ଜାଣିଥିବା ବେଳେ ଗୁଣିଗାରେଡ଼ି ଶିଖିଥିବା ଲୋକେ ସନ୍ଦେହ କରୁଥିଲେ। ସପ୍ତାହେ ତଳେ କାର୍ତ୍ତିକଙ୍କ ଏକ ଗାଈ ନନ୍ଦିନୀଙ୍କ ବାଡିରେ ପଶି ଯାଇଥିଲା। ଏ ନେଇ କାର୍ତ୍ତିକ ଓ ନନ୍ଦିନୀଙ୍କ ପରିବାର ଲୋକଙ୍କ ମଧ୍ୟରେ ବଚସା ହୋଇଥିଲା। କିଛିଦିନ ପରେ କାର୍ତ୍ତିକଙ୍କ ଦାଦାପୁଅ ସନାତନଙ୍କୁ ଜ୍ୱର ହୋଇଥିଲା। ଜ୍ୱର ଠିକ୍ କରିବାକୁ ପରିବାର ଲୋକେ ତାଙ୍କୁ ନନ୍ଦିନୀଙ୍କ ପାଖକୁ ନେଇଥିଲେ। ଏହି ସମୟରେ ସନାତନ ଆଉ ବଞ୍ଚିବେ ନାହିଁ ବୋଲି ନନ୍ଦିନୀ କହିଥିଲେ। ଏହାପରେ ପରିବାର ଲୋକେ ସନାତନଙ୍କୁ ଦାନଗଦି ଓ ଯାଜପୁର ସଦର ଡାକ୍ତରଖାନାକୁ ନେଇଯାଇଥିଲେ। ବୁଧବାର ଅପରାହ୍ନ ୪ଟା ସମୟରେ ସନାତନଙ୍କୁ ଘରକୁ ଫେରାଇ ଆଣୁଥିବା ବେଳେ ରାସ୍ତାରେ ତାଙ୍କର ମୃତ୍ୟୁ ହୋଇଥିଲା। କାର୍ତ୍ତିକ ଏଥିରେ ପ୍ରତିଶୋଧପରାୟଣ ହୋଇ ନନ୍ଦିନୀଙ୍କୁ ଏକ ଟାଙ୍ଗିଆରେ ହାଣି ହତ୍ୟା କରିଥିବା ଜଣାପଡ଼ିଛି। ଏ ନେଇ ଫାଣ୍ଡି ଅଧିକାରୀ ଗୋବର୍ଦ୍ଧନ ନାୟକ କହିଛନ୍ତି, ଅଭିଯୁକ୍ତ କାର୍ତ୍ତିକଙ୍କୁ ଅଟକ ରଖି ଅଧିକ ପଚରାଉଚୁରା ଚାଲିଛି।
