କଲମ୍ବୋ, ୨୯।୮- ନିଜର ସ୍ପିନ ବୋଲିଂର ବିବିଧିତା ଲାଗି ଏକଦା ବିଶ୍ୱ କ୍ରିକେଟରେ ଚହଳ ସୃଷ୍ଟି କରିଥିବା ରହସ୍ୟମୟ ଶ୍ରୀଲଙ୍କା ସ୍ପିନର ଅଜନ୍ତା ମେଣ୍ଡିସ ବୁଧବାର ସମସ୍ତ ପ୍ରକାର କ୍ରିକେଟ୍ରୁ ଅବସର ଘୋଷଣା କରିଛନ୍ତି। ୩୪ ବର୍ଷୀୟ ମେଣ୍ଡିସ ଗତ ୪ ବର୍ଷ ହେଲା ଜାତୀୟ ଦଳ ପକ୍ଷରୁ ପ୍ରତିନିଧିତ୍ୱ କରିନାହାନ୍ତି। ଶେଷଥର ପାଇଁ ସେ ୨୦୧୫ରେ ଖ୍ରୀଷ୍ଟଚର୍ଚ୍ଚରେ ଘରୋଇ ନ୍ୟୁଜିଲାଣ୍ଡ ବିପକ୍ଷରେ ନିଜର ଅନ୍ତିମ ମ୍ୟାଚ୍ ଖେଳିଥିଲେ। ୧୧ ବର୍ଷର କ୍ୟାରିୟରରେ ମେଣ୍ଡିସ ୧୯ ଟେଷ୍ଟ, ୮୭ ଦିନିକିଆ ଓ ୩୯ ଟି୨୦ ମ୍ୟାଚ୍ ଖେଳି ଯଥାକ୍ରମେ ୭୦, ୧୫୨ ଓ ୬୬ ଉଇକେଟ୍ ଅକ୍ତିଆର କରିଛନ୍ତି। ମୋଟ୍ ଉପରେ ସେ ୧୪୫ ଅନ୍ତର୍ଜାତୀୟ ମ୍ୟାଚ୍ରୁ ୨୮୮ ଉଇକେଟ୍ ନେଇଛନ୍ତି। ଦିନିକିଆ କ୍ରିକେଟ୍ ଦ୍ରୁତତ୍ତମ ୫୦ ଉଇକେଟ୍ ତାଙ୍କ ନାମରେ ରହିଛି। ମାତ୍ର ୧୯ ମ୍ୟାଚ୍ରୁ ସେ ଏହି ମାଇଲଖୁଣ୍ଟ ସ୍ପର୍ଶ କରିଥିଲେ। ସେହିଭଳି ବିଶ୍ୱର ଏକମାତ୍ର ବୋଲର ଭାବେ ଟି୨୦ କ୍ରିକେଟ୍ରେ ମେଣ୍ଡିସ ଦୁଇଥର ୬ ଉଇକେଟ୍ ସଫଳତା ଅର୍ଜନ କରିଛନ୍ତି।
ପ୍ରାରମ୍ଭରେ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା ଏହି ଡାହାଣହାତୀ ଶ୍ରୀଲଙ୍କା ସ୍ପିନରଙ୍କୁ ‘କ୍ୟାରମ ବଲ୍’ ର ଜନକ ବୋଲି କୁହାଯାଏ। ୨୦୦୮ରେ ଭାରତ ବିପକ୍ଷ ଟେଷ୍ଟ ସିରିଜରେ ମେଣ୍ଡିସ ପଦାର୍ପଣ କରି ବେଶ୍ ସଫଳତା ପାଇଥିଲେ। ଦୃଢ଼ ବ୍ୟାଟିଂ ଲାଇନ୍ଅପ୍ ପାଇଁ ସେହି ସମୟରେ ପରିଚିତ ଲାଭ କରିଥିବା ଭାରତୀୟ ବ୍ୟାଟ୍ସମ୍ୟାନଙ୍କୁ ଚକ୍ମା ଦେଖାଇ ସେ ୩ ମ୍ୟାଚ୍ ବିଶିଷ୍ଟ ଏହି ସିରିଜରେ ମୋଟ୍ ୨୮ ଉଇକେଟ୍ ଅକ୍ତିଆର କରିଥିଲେ। ରାହୁଲ ଡ୍ରାଭିଡ୍, ଭିଭିଏସ୍ ଲକ୍ଷ୍ମଣ, ସଚିନ ତେନ୍ଦୁଲକର ଓ ସୌରଭ ଗାଙ୍ଗୁଲିଙ୍କ ପରି ବ୍ୟାଟ୍ସମ୍ୟାନ ମେଣ୍ଡିସଙ୍କ ସ୍ପିନ ବିବିଧତାକୁ ଖେଳିବାରେ ସମ୍ପୂର୍ଣ୍ଣ ବିଫଳ ହୋଇଥିଲେ। ଏପରିକି ଗୋଟିଏ ଓଭରରେ ସେ ୬ ପ୍ରକାରର ବଲ୍ ପକାଇ ବ୍ୟାଟ୍ସମ୍ୟାନଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି କରିଥିଲେ। ୨୦୦୮ ଏସିଆ କପ୍ ଫାଇନାଲରେ ଭାରତ ବିପକ୍ଷରେ ସେ ୧୩ ରନ ବ୍ୟୟରେ ୬ ଉଇକେଟ୍ ହାସଲ କରି ଶ୍ରୀଲଙ୍କାକୁ ଚାମ୍ପିୟନ କରାଇବାରେ ନାୟକ ସାଜିଥିଲେ। ମେଣ୍ଡିସଙ୍କ ଏହି ମାରାତ୍ମକ ସ୍ପେଲ୍ ଆଜିବି କ୍ରିକେଟ୍ପ୍ରେମୀଙ୍କ ମନରେ ଉଜ୍ଜୀବିତ୍ ରହିଛି।
