କୋଲକାତା, ୨ା୧୦(ପି.ଟି.): ସାରଦା ଚିଟ୍ଫଣ୍ଡ ଦୁର୍ନୀତି ମାମଲାରେ ବରିଷ୍ଠ ପୋଲିସ ଅଧିକାରୀ ରାଜୀବ କୁମାରଙ୍କୁ ମଙ୍ଗଳବାର କୋଲକାତା ହାଇକୋର୍ଟ ଆଗୁଆ ଜାମିନ ପ୍ରଦାନ କରିଛନ୍ତି। ବିଚାରପତି ଜଷ୍ଟିସ ଏସ୍. ମୁନ୍ସିି ଓ ଜଷ୍ଟିସ ଏସ୍. ଦାସଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ ଶୁଣାଣି ବେଳେ କହିଛନ୍ତି, ସିବିଆଇ କୁମାରଙ୍କୁ ଗିରଫ କଲେ ସେ କୋର୍ଟରୁ ଜାମିନ ପାଇପାରିବେ। ହାଜତରେ ତାଙ୍କୁ ଜେରା ଲାଗି ଆବେଦନକାରୀଙ୍କ ଏହା ଉଚିତ ପଦକ୍ଷେପ ନୁହେଁ। ଏଥିସହ ଖଣ୍ଡପୀଠ ତଦନ୍ତରେ ସହଯୋଗ କରିବା ଓ ତଦନ୍ତକାରୀ ଅଧିକାରୀଙ୍କ ନିକଟରେ ହାଜର ହେବା ଲାଗି କୁମାରଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ପୂର୍ବରୁ କୁମାରଙ୍କ ଆଗୁଆ ଜାମିନ ଆବେଦନକୁ ଆଲିପୁର ଜିଲା ଓ ସେସନ୍ସ କୋର୍ଟ ପକ୍ଷରୁ ଖାରଜ କରାଯାଇଥିଲା। ସାରଦା ଚିଟ୍ଫଣ୍ଡ ମାମଲାରେ ସାକ୍ଷୀଭାବେ ତାଙ୍କୁ ତଦନ୍ତ ଅଧିକାରୀଙ୍କ ଆଗରେ ହାଜର ହେବା ଲାଗି ସିବିଆଇ ପକ୍ଷରୁ ମେ ୨୭ରୁ ଏକାଧିକ ଚିଠି କରାଯାଇଥିଲେ ହେଁ ସେ ଧରାଛୁଆଁ ଦେଉ ନ ଥିଲେ।
