ଗୁଡ଼ଭେଲା,୨୧ା୮(ଡି.ଏନ୍.ଏ.): ବଲାଙ୍ଗୀର ଜିଲା ଗୁଡ଼ଭେଲା ବ୍ଲକ ଡୁଙ୍ଗିବାହାଲ ଗଁାର ମେଘନାଦ ରଣାକଁର ଝି’ ହେଉଛନ୍ ରୂପେଲି(୩)। ସେ ଜନମ୍ ହେବାର ଦୁଇ ମାସ ଉତାରୁ ରୂପେଲିର ଦିହିପା ଖରାପ ହେଲା। ମା’ବାପ୍ ଝି’କେ ପହେଲା ଗୁଡ଼ଭେଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର, ପଛେ ଜିଲା ମୁଖିଆ ଡାକ୍ତରଖାନା ଆର ବୁର୍ଲାକେ ନେଇ ଚିକିଛା କରାଲେ, ହେଲେ କିଛି ଲାଭ୍ ନାଇଁ ହେଲା। ଇଆଡ଼େ ରୂପେଲିର ମୁଡ଼ ବଢ଼ୁଥିଲାବେଲେ ସେ ହିସାବେ ଗୋଡ଼ହାତ୍ ନାଇଁ ବଢ଼ବାର। ବଏସ୍ ବଢ଼ୁଥିଲେ ବି ସେ ଚାଲବୁଲ କି କଥାବାରତା ନାଇଁ କରିପାରବାର। ରୂପେଲିର ମୁଡ଼ର ଉଜନ ବଢ଼ବାରେ ଲାଗିଥିଲାବେଲେ ସେ ମୁଡ଼ ସିଧା କରି ରଖି ନାଇଁପାରବାର। ତାହାକୁ ସବୁବେଲେ ସଜେ ବତ୍ରେ ପାଇ କଲେଯାଇ, ନାଇଁ ହେଲେ ଅନେକ ସମିଆରେ ତାକର ଗୋଡ଼ହାତ୍ ଭାଂଗି ଯାଉଛେ ଆର ଦିନାକେତେ ଉତାରୁ ତାର ମନ୍କେ ଯୁଡ଼ି ହେଇଯାଉଛେ। ଇଆଡ଼ ମେଘନାଦ କୁଲି ମଜୁରି କରି ଦୁଇ ପଏସା ଆନ୍ଲେ ଯାଇ ଘରର ଚୁଲି ଜଲୁଛେ। ଏନ୍ତାଥି ସେ ଝି’ର ଉଚ ଚିକିଛା କଥା ଚିନ୍ତା କରି ନାଇଁପାରବାର। ସେନ୍ତା ଇ ପରିବାରଟା ବିଜୁ ସ୍ବାସ୍ଥ୍ୟ କଲ୍ୟାଣ ବୀମା ଯୋଜନାରେ ବି ସାମିଲ ନାଇଁ ହେଇପାରି। ଇ ବାବ୍ଦେ ଗଲା ୧୮ ତାରିଖ୍ ଧରିତ୍ରୀ ସମ୍ବଲପୁର ସଂସ୍କରଣରେ‘ରୂପେଲିର ଚିକିଛା ଲାଗି ଟଁକା ଅଭାବ୍, ଚିନ୍ତାରେ ଗରିବ୍ ମା’ବାପ୍’ ଶୀରଷକ୍ରେ ଖବର ବାହାରିଥିଲା। ଖବର ବାହାରଲା ଉତାରୁ ଡା.ପ୍ରଶାନ୍ତ ସିଂ ଧରୁଆ ଆର ଡା.ସ୍ମରଣିକା ପଣ୍ଡାକଁର ମଂଗୁଆଲତିରେ ଗୁଟେ ଡାକ୍ତରୀ ମଙ୍ଗଲବାର ମେଘନାଦକଁର ଘରେ ପୁହୁଁଚିଥିଲେ। ଡାକ୍ତରୀ ଦଲର କହେବାର ହିସାବେ ରୂପେଲିର ଚିକିଛା ଲାଗି ତାହାକୁ ଦୁଇ ଥର ବୁର୍ଲା ପଠାଯାଇଥିଲା। ହେଲେ ପରିବାର ଲୋକ୍ ଛୁଆର ଦିହିପାରେ କିଛି ପରିବରତନ୍ ନାଇଁ ହେବାର ଭାବି ଆଗ୍କେ ନାଇଁ ବଢ଼ବାର ଲେଖେଁ ଲାଗୁଛେ ବଲି ଡାକ୍ତରି ଦଲ୍ କହିଥିଲେ। ହେଲେ ଆମେ ପରିବାର ଲୁକ୍କୁ ବୁଝାସୁଝା କରି ରୂପେଲିର ଚିକିଛା ଲାଗି ପଦକ୍ଷେପ ନେମୁ ବଲି ଗୁଡ଼ଭେଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିଛା ଅଧ୍କାରୀ ଡା.ବିବେକ ଧରୁଆ କହିଛନ୍।
