ଜୋହାନ୍ସବର୍ଗ,୧୮।୧୧(ଏଏଫ୍ପି)- କେପ୍ଟାଉନ ସିଟି ମିଡ୍ଫିଲ୍ଡର ଏମ୍ଫୋ ମାକୋଲାଙ୍କୁ ଏକ ମ୍ୟାଚ୍ବେଳେ ମିଳିଥିବା ହଳଦିଆ କାର୍ଡ ୬ ମାସ ବାସନ୍ଦାଦେଶରେ ପରିଣତ ହୋଇଛି। ଲିଗ୍ କପ୍ ମ୍ୟାଚ୍ରେ ପ୍ରତିପକ୍ଷ ଦଳ କେଜର ଚିଫ୍କୁ ପେନାଲ୍ଟି ମିଳିବା ପରେ ୩୩ ବର୍ଷୀୟ ପୂର୍ବତନ ଅନ୍ତର୍ଜାତୀୟ ଖେଳାଳି ଉତ୍ତ୍ୟକ୍ତ ହୋଇ ରେଫରି ଆବୋଙ୍ଗିଲେ ଟମ୍ଙ୍କୁ ଦୁଇ ହାତରେ ଧକ୍କା ମାରିଥିଲେ। ଏଭଳି ଅପରାଧ ପାଇଁ ରେଡ୍ କାର୍ଡ ମିଳିପାରେ ବୋଲି ରେଫରି ମାକୋଲାଙ୍କୁ ଚେତାଇବା ପରେ ସାଥୀ ଖେଳାଳି ତାଙ୍କୁ ଦୂରକୁ ଟାଣି ନେଇଥିଲେ। ଏହି କାରଣରୁ ମାକୋଲାଙ୍କୁ ବାସନ୍ଦ କରାଯାଇଛି। ଏହି ନିଷ୍ପତ୍ତି ଦେଶର ବହୁ ଫୁଟ୍ବଲରଙ୍କୁ ଚକିତ କରିଦେଇଛି। କାରଣ ଫୁଟ୍ବଲ ଫିଲ୍ଡରେ ଏଭଳି ଘଟଣା କିଛି ନୂଆ ନୁହେଁ। ଏଥିନେଇ ଅତିକମ୍ରେ ଖେଳାଳିଙ୍କୁ ରେଡ୍ କାର୍ଡ କିମ୍ବା ଅର୍ଥଦଣ୍ଡ କିମ୍ବା ଉଭୟ ଦଣ୍ଡାଦେଶ ଦିଆଯାଏ। ଏହାପୂର୍ବରୁ ଜଣେ ଖେଳାଳି ରେଫରିଙ୍କ ଉପରକୁ ଛେପ ପକାଇବାରୁ ତାଙ୍କୁ ଏକ ବର୍ଷ ବାସନ୍ଦାଦେଶ ଦିଆଯାଇଥିଲା। ପରବର୍ତ୍ତୀ ସମୟରେ ବାସନ୍ଦାଦେଶକୁ ୬ ମ୍ୟାଚ୍ ପର୍ଯ୍ୟନ୍ତ ହ୍ରାସ କରାଯାଇଥିଲା। ଏଥିସହ ଜରିମାନା ବାବଦକୁ ଏକ ଲକ୍ଷ ର଼୍ୟାଣ୍ଡ (୪.୮୭ ଲକ୍ଷ ଟଙ୍କା) ଦେବାକୁ ପଡ଼ିଥିଲା।
