ନୂଆଦିଲ୍ଲୀ, ୩।୬: କରୋନା ସଂକ୍ରମଣରୁ ଦୂରେଇ ରହିବା ଲାଗି ଦେଶରେ ଲକ୍ଡାଉନ୍-୫ ଜୁନ୍ ୧ଠାରୁ ଜାରି ହୋଇଛି। ଏଥିରେ ବହୁ କ୍ଷେତ୍ରରେ ସର୍ତ୍ତ ଭିତ୍ତିକ କୋହଳ ନୀତି ଲାଗୁ କରାଯାଇଛି। ଲକ୍ଡାଉନ୍-୫ରେ ପ୍ରତିଦିନ ନୂଆ କରୋନା ସଂକ୍ରମିତଙ୍କ ସଂଖ୍ୟା ୯ ହଜାରରୁ ଅଧିକ ରହୁଛି। ବୁଧବାର ନୂଆ ସଂକ୍ରମିତ ସଂଖ୍ୟା ୮ ହଜାର ୯୦୯ ଛୁଇଁଛି। ଏହାପୂର୍ବରୁ ଜୁନ୍ ୨ରେ ନୂଆ ସଂକ୍ରମିତଙ୍କ ସଂଖ୍ୟା ୮ ହଜାର ୧୭୧ ଥିଲା। ସେହିପରି ଜୁନ୍ ୧ରେ ନୂଆ ସଂକ୍ରମିତଙ୍କ ସଂଖ୍ୟା ୮ ହଜାର ୩୯୨ ଥିଲା। ଇତିମଧ୍ୟରେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୨ ଲକ୍ଷ ୮ ହଜାର ୫୪୩ରେ ଛୁଇଁଛି। ସେହିପରି ମୃତକଙ୍କ ସଂଖ୍ୟା ୫ ହଜାର ୮୩୪ରେ ପହଞ୍ଚିଛି। ଅପରପକ୍ଷରେ ସଂକ୍ରମିତଙ୍କ ସୁସ୍ଥ ହେବା ସଂଖ୍ୟା ମଧ୍ୟ ବଢ଼ିବାରେ ଲାଗିଛି। ବୁଧବାର ସୁଦ୍ଧା ଲକ୍ଷେ ୪୧୯ ଜଣ ସଂକ୍ରମିତ ସୁସ୍ଥ ହୋଇ ଘରକୁ ଫେରିଛନ୍ତି। ଦେଶରେ ମାର୍ଚ୍ଚ ୨୪ରେ ପ୍ରଥମ ଲକ୍ଡାଉନ୍ ଘୋଷଣା କରାଯାଇଥିଲା। ଏହାପରେ ୪ଥର ଲକ୍ଡାଉନ୍ ଜାରି ହୋଇଛି। ତେବେ ପ୍ରତି ଲକ୍ଡାଉନ୍ ପରେ ନୂଆ ସଂକ୍ରମିତଙ୍କ ହାର ବଢ଼ିବାରେ ଲାଗିଛି। ଚତୁର୍ଥ ଲକ୍ଡାଉନ୍ ଆରମ୍ଭ ସମୟରେ ସଂକ୍ରମିତଙ୍କ ସଂଖ୍ୟା ୯୦ ହଜାରରୁ ଅଧିକ ଥିବାବେଳେ ପଞ୍ଚମ ଲକ୍ଡାଉନ୍ର ଆରମ୍ଭରେ ଏହା ଲକ୍ଷେ ୮୦ ହଜାର ଛୁଇଁଥିଲା। ଏବେ ଏହା ପଞ୍ଚମ ଲକ୍ଡାଉନ୍ର ମାତ୍ର ୩ ଦିନ ମଧ୍ୟରେ ୨ ଲକ୍ଷ ଟପିଛି। ଏଭଳି ଧାରା ଆଗାମୀ ଦିନରେ ଜାରି ରହିଲେ ସ୍ଥିତି ଅସମ୍ଭାଳ ହେବ ବୋଲି କୁହାଯାଉଛି।
