କୋଚି,୧୭।୧୧: କେରଳର ଜଣେ ମହିଳା ପୋଲିସ ଅଧିକାରୀ ଲଣ୍ଡା ହେବାର ଫଟୋ ଓ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ହେଲେ ଏହା ପଛର କାରଣ ସମାଜକୁ ଏକ ବାର୍ତ୍ତା ଦେଇଛି। ଅପର୍ଣ୍ଣା ଲବକୁମାର ନାମକ ମହିଳା ପୋଲିସ ଅଧିକାରୀ ଜଣକ କିଛିଦିନ ତଳେ ତ୍ରିଚୁରର ଏକ ବିୟୁଟି ପାର୍ଲରେ ଲଣ୍ଡା ହୋଇ ପଡିଥିଲେ। ଆଉ ସେହି ସମୟର କିଛି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଅପର୍ଣ୍ଣା ତାଙ୍କର କେଶକୁ ତ୍ରିଚୁରରେ ଥିବା କ୍ୟାନସର ରିସର୍ଚ୍ଚ ସେଣ୍ଟରକୁ ଦାନ କରିଦେଇଛନ୍ତି। ସେ କହିଛନ୍ତି ଏହାବଦଳରେ ଯଦି କ୍ୟାନସର ପୀଡିତ ପିଲାମାନଙ୍କ ମୁହଁରେ ହସ ଫୁଟିଲା ତେବେ ତାହା ତାଙ୍କ ପାଇଁ ଯଥେଷ୍ଟ। ତେବେ ତ୍ରିଚୁରରେ ଥିବା କ୍ୟାନସର ରିସର୍ଚ୍ଚ ସେଣ୍ଟରରେ ଗରିବ କ୍ୟାନସର ରୋଗୀଙ୍କ ପାଇଁ ଓ୍ବିଗ ତିଆରି କରାଯାଉଛି। ଆଉ ଯେଉଁମାନେ କୃତ୍ରିମ ଓ୍ବିଗ ଲଗାଉଛନ୍ତି ସେଥିରେ ଇନଫେକ୍ସନର ଭୟ ରହିଛି। ଯାହା ପ୍ରାକୃତିକ ଓ୍ବିଗରେ ନାହିଁ। ହେଲେ କେଶରୁ ତିଆରି ଓ୍ବିଗ ଯେହେତୁ ଅଧିକ ଦାମ୍ ହୋଇଥାଏ ତାହା କିଣିବା ସମସ୍ତଙ୍କ ପକ୍ଷେ ସମ୍ଭବ ହୋଇ ନ ଥାଏ। ତେଣୁ ସେ ତାଙ୍କ କେଶ ଦାନ କରି କ୍ୟାନସର ରୋଗୀଙ୍କ ମୁହଁରେ ହସ ଫୁଟାଇବାକୁ ସାମାନ୍ୟ ପ୍ରୟାସ କରିଛନ୍ତି ବୋଲି କହିଛନ୍ତି। ଏହାକୁ ଦେଖିବା ପରେ ସୋସିଆଲ ମିଡିଆରେ କେତେଜଣ ଯୁବତୀ ତାଙ୍କର ଏହି କାମରୁ ପ୍ରେରଣା ପାଇଛନ୍ତି ବୋଲି ଲେଖିଛନ୍ତି। ହେଲେ ତାଙ୍କୁ ଦେଖି ପ୍ରଭାବିତ ନ ହେବାକୁ ଅପର୍ଣ୍ଣା ପରାମର୍ଶ ଦେବା ସହ ଗରିବ ଓ ସାହାଯ୍ୟ ଆବଶ୍ୟକ ଥିବା ବ୍ୟକ୍ତିଙ୍କୁ ସାହାଯ୍ୟ କରିବାକୁ ସେ ପରାମର୍ଶ ଦେଇଛନ୍ତି।
