ନୂଆଦିଲ୍ଲୀ,୬।୬: ଲୋକଙ୍କ ସ୍ବାସ୍ଥ୍ୟଠାରୁ ଆର୍ଥତ୍କ ପ୍ରସଙ୍ଗ ବଡ଼ ନୁହେଁ। ଲକ୍ଡାଉନ ସମୟରେ ଘୋଷଣା ହୋଇଥିବା ଲୋନ୍ ମୋରାଟୋରିୟମ ମାମଲା ଉପରେ ଶୁଣାଣି ବେଳେ ସୁପ୍ରିମକୋର୍ଟ ଗୁରୁବାର ଏହା କହିଛନ୍ତି। ମହାମାରୀ ସମୟରେ ଲୋକଙ୍କ ଋଣ ଉପରେ ସୁଧ ଛାଡ କରିବା ଲାଗି ଆର୍ବିଆଇ ସଫାସଫା ମନା କରି ଦେଇଛି। କେନ୍ଦ୍ରୀୟ ବ୍ୟାଙ୍କର ଏଭଳି ବ୍ୟବହାରକୁ ନେଇ ସର୍ବୋଚ୍ଚ ନ୍ୟାୟାଳୟ ଉଦ୍ବେଗ ପ୍ରକାଶ କରିଛନ୍ତି। ଋଣ ଉପରେ ସୁଧଛାଡ ହେଲେ ବ୍ୟାଙ୍କଗୁଡିକ ପ୍ରାୟ ୨ ଲକ୍ଷ କୋଟି ଟଙ୍କାର କ୍ଷତି ସହିବେ ବୋଲି କେନ୍ଦ୍ରୀୟ ବ୍ୟାଙ୍କ ଉତ୍ତରରେ ନ୍ୟାୟାଳୟଙ୍କୁ କହିଛି। ବର୍ତ୍ତମାନ ଅଗଷ୍ଟ ୩୧ ଯାଏ ଲୋକଙ୍କୁ ଲୋନ୍ ମୋରାଟୋରିୟମ ପ୍ରଦାନ କରାଯାଇଛି। ମାମଲା ଉପରେ ଜଷ୍ଟିସ ଅଶୋକ ଭୂଷଣ, ଜଷ୍ଟିସ ସଞ୍ଜୟ କିଷାନ କୌଲ, ଜଷ୍ଟିସ ଏମ୍.ଆର୍.ଶାହ ଶୁଣାଣି କରୁଛନ୍ତି। ଏହି ପ୍ରସଙ୍ଗ ଊପରେ ଅର୍ଥ ମନ୍ତ୍ରଣାଳୟର କ’ଣ ପ୍ରସ୍ତୁତି ରହିଛି ସେ ନେଇ ସର୍ବୋଚ୍ଚ ନ୍ୟାୟଳୟ ଜାଣିବାକୁ ଚାହିଁଥିଲେ। ଜୁନ ୧୨ରେ ଏହି ମାମଲା ଉପରେ ପୁଣି ଶୁଣାଣି ହେବ। ଗୋଟିଏ ସପ୍ତାହ ମଧ୍ୟରେ ଉତ୍ତର ରଖିବାକୁ ଅର୍ଥ ମନ୍ତ୍ରଣାଳୟକୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି।
