ବନ୍ତଳା,୧୬।୬(ଡି.ଏନ୍.ଏ.): ଅନୁଗୋଳ ଜିଲା ପୁରୁଣାକୋଟ ଥାନା କୋଠଭୂଇଁ ପଞ୍ଚାୟତରେ ରବିବାର ଏକ ଅଭାବନୀୟ ଘଟଣା ଘଟିଥିବା ଦେଖିବାକୁ ମିଳିଛି। କୁମୁରି ଗ୍ରାମ ମୁଣ୍ଡରେ ଥିବା ଏକ ଆମ୍ବ ଗଛରେ ଦୁଇ ବିବାହିତ ପ୍ରେମୀଯୁଗଳ ରଶି ଲଗାଇ ଆତ୍ମହତ୍ୟା କରିଛନ୍ତି। ସେମାନେ ହେଲେ ଡଲାସିଙ୍ଗା ଗ୍ରାମର ମଧୁ ସାହୁ(୩୫) ଓ କୋଠଭୂଇଁ ଗ୍ରାମର ଶାନ୍ତି ପ୍ରଧାନ (୩୮)। ଉଭୟ ପୂର୍ବରୁ ବିବାହିତ ଥିବା ବେଳେ ସେମାନଙ୍କୁ ଉକ୍ତ ବିବାହରୁ ଦୁଇଟି ଲେଖାଏଁ ସନ୍ତାନ ଥିବା ଜଣାପଡ଼ିଛି।
ସୂଚନାନୁଯାୟୀ, ଏକ ବର୍ଷ ପୂର୍ବେ ମଧୁ ଓ ଶାନ୍ତିଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ଏ ନେଇ ଶାନ୍ତିଙ୍କ ସ୍ବାମୀ ଜାଣିବା ପରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହେବା ସହ ସମାଧାନ ନିମନ୍ତେ ଘଟଣା କୋର୍ଟରେ ପହଞ୍ଚିଥିଲା। ତେବେ ୬ ମାସ ପୂର୍ବେ ମଧୁ ଏବଂ ଶାନ୍ତି କୋର୍ଟରେ ବିବାହ କରି ଘରୁ ପଳାଇ ଆସିଥିଲେ। ଶନିବାର ଉଭୟ ରଜ ଉପଲକ୍ଷେ ଦଲାସିଙ୍ଗା ଗ୍ରାମକୁ ଆସିଥିଲେ। ହେଲେ ଲୋକ ଲଜ୍ଜା ସହି ନ ପାରି ସେମାନେ ଆତ୍ମହତ୍ୟା କରିଥିବା ଅନୁମାନ କରାଯାଉଛି। ସେମାନଙ୍କ ମୃତଦେହ ନିକଟରେ ସ୍କୁଟ ିଟିଏ ରଖାଯାଇଥିବା ଦେଖିବାକୁ ମିଳୁଛି। ଘଟଣା ନେଇ ଖବର ପ୍ରଚାରିତ ହେବା ପରେ ଘଟଣାସ୍ଥଳରେ ଲୋକମାନଙ୍କ ଭିଡ଼ ପରିଲକ୍ଷିତ ହେଉଛି। ଖବର ଲେଖାଯିବା ପର୍ଯ୍ୟନ୍ତ ଉଭୟଙ୍କ ପରିବାର ପକ୍ଷରୁ ଅଭିଯୋଗ କରାଯାଇ ନ ଥିବା ଜଣାପଡ଼ିଛି।
