ଭୁବନେଶ୍ୱର, ୫।୪(ବ୍ୟୁରୋ):
ଖୋର୍ଦ୍ଧା ବନଖଣ୍ଡ ଅଧିନସ୍ଥ ବରବରା ରେଞ୍ଜ ଅଧୀନରେ ଗତ ୧ ତାରିଖରେ ଘଟିଯାଇଛି ତୁମୁଳ ଲଙ୍କା କାଣ୍ଡ। ଶୁଆ ବିକାଳିଙ୍କୁ କାହିଁକି ବିକୁଛ ବୋଲି ପଚାରିବାରୁ ଆରମ୍ଭ ହେଇଥିଲା ଏହି କାଣ୍ଡ। ୧ତାରିଖରେ ସବୁ ଆଡ଼େ ଲକଡାଉନ ଚାଲିବା ଅବସ୍ଥାରେ ମଧ୍ୟ ବରବରା ଅଞ୍ଚଳରେ କିଛି ଯୁବକ ୨ଟି ଶୁଆ ବିକ୍ରି କରୁଥିବା ଦେଖି ବନ କର୍ମଚାରୀମାନେ ଆକଟ କରିଥିଲେ। ସେହି ରାଗ ରଖି ୫୦ ରୁ ଉର୍ଦ୍ଧ୍ବ ଗ୍ରାମବାସୀ ସଂଘବଦ୍ଧ ଭାବରେ ଠେଙ୍ଗା, ବାଡ଼ି, ଲୁହା ଛଡ଼ ଆଦିରେ ଆକ୍ରମଣ କରିଥିଲେ। ସରକାରୀ ଗାଡ଼ି ଏବଂ ବନ କର୍ମଚାରୀଙ୍କ ନିଜ ଗାଡ଼ି ମଧ୍ୟ ଭାଙ୍ଗି ଚୁରମାର କରିଦେଇଛନ୍ତି।
ଏହି ଆକ୍ରମଣରେ ବନରକ୍ଷୀ ଆଶିଷ ମହାନ୍ତି, ନୀଳାଦ୍ରି ପ୍ରସାଦ, ସୌମ୍ୟ ରଞ୍ଜନ ବେହେରା, କବିତା ଜାଲିଙ୍କ ସମେତ ଆହୁରି ଅନେକ ବନ କର୍ମଚାରୀ ଗୁରୁତର ଆହତ ହେଇଛନ୍ତି। ସରକାରୀ କର୍ମଚାରୀଙ୍କ ଉପରେ ଏହି ମରଣାନ୍ତକ ଆକ୍ରମଣକୁ ନେଇ ବରବରା ରେଞ୍ଜର ଡେପୁଟି ରେଞ୍ଜର ଧୀରେନ କୁମାର ପ୍ରଧାନ ଗତ ୧ ତାରିଖରୁ ବାଣପୁର ଥାନାରେ ଲିଖିତ ଅଭିଯୋଗ କରିଥିଲେ ମଧ୍ୟ ଏଯାଏଁ କିଛି ବି କାର୍ଯ୍ୟାନୁଷ୍ଠାନ ହେଇ ନାହିଁ। ଏହି ଘଟଣାକୁ ଅଣଗେଜେଟେଡ ବନ କର୍ମଚାରୀ ସଂଘର ସମ୍ପାଦକ ସମୀର ବେହେରା ଦୃଢ଼ ନିନ୍ଦା କରିବା ସହ ଘଟଣାରେ ସମ୍ପୃକ୍ତ ବ୍ୟକ୍ତି ମାନଙ୍କୁ ତୁରନ୍ତ ଗିରଫ କରିବା ପାଇଁ ଦାବୀ କରିଛନ୍ତି। ଏହା ନକଲେ ବନ କର୍ମଚାରୀଙ୍କ ମନୋବଳ ଭାଙ୍ଗି ଯିବ ବୋଲି ସମୀର କହିଛନ୍ତି।
