ନୂଆଦିଲ୍ଲୀ, ୩ା୫ (ପି.ଟି.)-ଡୋପ୍ ଟେଷ୍ଟରେ ବିଫଳ ହେବାରୁ ଆଥଲେଟିକ୍ସ ଇଣ୍ଟିଗ୍ରିଟି ୟୁନିଟ୍ ଡିସ୍କସ୍ ଥ୍ରୋୟର ସନ୍ଦୀପ କୁମାରୀଙ୍କୁ ୪ ବର୍ଷ ବାସନ୍ଦ କରିଛି। କୌତୂହଳର କଥା ଏହିକିଯେ, ୨୦୧୮ରେ ଗୁଆହାଟୀଠାରେ ଜାତୀୟ ଆନ୍ତଃ ରାଜ୍ୟ ଚାମ୍ପିୟନଶିପ୍ ବେଳେ ନ୍ୟାଶନାଲ ଆଣ୍ଟି ଡୋପିଂ ଏଜେନ୍ସି (ନାଡା)ର ଅଫିସିଆଲମାନେ କୁମାରୀଙ୍କଠାରୁ ରକ୍ତ ନମୁନା ସଂଗ୍ରହ କରିଥିଲେ। ନ୍ୟାଶନାଲ ଡୋପ୍ ଟେଷ୍ଟିଂ ଲାବୋରେଟୋରି (ଏନ୍ଡିଟିଏଲ୍)ରେ ଏହାର ପରୀକ୍ଷା କରାଯାଇଥିଲା। ଫଳାଫଳ ନେଗେଟେିଭ ଆସିଥିଲା। କୁମାରୀ ଏହି ଚାମ୍ପିୟନଶିପ୍ରେ ୫୮.୪୧ ମିଟି ଥ୍ରୋ କରି ସ୍ବର୍ଣ୍ଣ ପଦକ ଜିତିଥିଲେ। ଓ୍ବାଲର୍ଡ ଆଣ୍ଟି ଡୋପିଂ ଏଜେନ୍ସି (ଓ୍ବାଡା) କିନ୍ତୁ କୁମାରୀଙ୍କଠାରୁ ସଂଗୃହୀତ ସାମ୍ପଲକୁ ଆଉଥରେ କାନାଡାସ୍ଥିତ ମଣ୍ଟ୍ରିଲ ଲାବୋରେଟୋରିରେ ପରୀକ୍ଷା କରିବା ଲାଗି ନିଷ୍ପତ୍ତି ନେଇଥିଲା। ସେଥିରେ ଆନାବୋଲିକ୍ ଷ୍ଟେରଏଡ୍ ମେଟିନୋଲୋନ୍ ପାଇଁ ପଜିଟିଭ ଆସିଥିଲା। କୁମାରୀ ଏନ୍ଡିଟିଏଲ୍ ଦ୍ୱାରା ଦୋଷମୁକ୍ତ ହେବାର ୨ବର୍ଷ ପରେ ସେ ଦଣ୍ଡିତ ହୋଇଛନ୍ତି। ଫଳରେ ୨୦୧୮ ଜୁନ୍ ୨୬ରୁ ୨୦୧୮ ନଭେମ୍ବର ୨୧ ପର୍ଯ୍ୟନ୍ତ ତାଙ୍କର ସମସ୍ତ ଫଳାଫଳକୁ ରଦ୍ଦ କରିଦିଆଯାଇଛି। ଓ୍ବାଡାର ୪ ବର୍ଷିଆ ବାସନ୍ଦ ଦଣ୍ଡ ଶୁକ୍ରବାର ଘୋଷଣା କରାଯାଇଛି। ଏହା ସାମ୍ପଲ ସଂଗ୍ରହର ପରଦିନଠାରୁ କାର୍ଯ୍ୟକାରୀ ହେବ। କେବଳ କୁମାରୀ ନୁହଁନ୍ତି ଏନଡିଟିଏଲ୍ ଦ୍ୱାରା ନେଗେଟିଭ ଆସିଥିବା ଅନ୍ୟ ୪ଭାରତୀୟଙ୍କ ଫଳାଫଳ ମଧ୍ୟ ମଣ୍ଟ୍ରିଲ ଲାବରେଟୋରିରେ ନେଗେଟିଭ୍ ଆସିଛି। ସେମାନଙ୍କ ମଧ୍ୟରେ ୨୦୧୭ ଏସିଆନ ଚାମ୍ପିୟନ କ୍ୱାର୍ଟରମାଇଲର ନିର୍ମଳା ଶେଓରାନ ରହିଛନ୍ତି। ଅନ୍ୟ ଜଣେ ଝୁମା ଖାତୁନ୍ ଗତ ମାସରେ ୪ବର୍ଷ ବାସନ୍ଦ ହୋଇଛନ୍ତି।
