ଶ୍ରୀନଗର,୫।୮: ବର୍ତ୍ତମାନ ଜମ୍ମୁ କଶ୍ମୀରରେ ଉତ୍ତେଜନାପୂର୍ଣ୍ଣ ପରିସ୍ଥିତି ଲାଗିରହିଛି। ଗୋଟିଏ ପଟେ କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତି ଓ ଓମାର ଅବଦୁଲ୍ଲାଙ୍କୁ ନଜରବନ୍ଦୀ ରଖାଯାଇଥିବା ବେଳେ ଅନ୍ୟପଟେ ଶ୍ରୀନଗରରେ ୧୪୪ ଧାରା ଲାଗୁ କରାଯିବା ସହ ସ୍କୁଲ, କଲେଜ ଓ ଇଣ୍ଟରନେଟ ସେବା ବନ୍ଦ କରିଦିଆଯାଇଛି। ରାଜ୍ୟରେ ଜାରି ରହିଥିବା ଏଭଳି ପରିସ୍ଥିତିକୁ ନେଇ ବଲିଉଡ୍ ଅଭିନେତା ତଥା ପ୍ରଯୋଜକ କମାଲ ଆର ଖାନ କଶ୍ମୀର ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ ସମର୍ଥନ ଜଣାଇ ଏକ ଟୁଇଟ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ସେ କଶ୍ମୀର ପ୍ରସଙ୍ଗରେ ତାଙ୍କର ସମର୍ଥନ ଜଣାଇଛନ୍ତି। ଏଥିସହ ସେ ଲେଖିଛନ୍ତି, ଯଦି କଶ୍ମୀର ଭାରତର ତେବେ ଅଧା ନୁହେଁ ବରଂ ସମ୍ପୁର୍ଣ୍ଣ ଭାରତୀୟଙ୍କର ହେବା ଉଚିତ୍। ଦିଲ୍ଲୀ, ମୁମ୍ବାଇ ଭଳି ସମ୍ପୂର୍ଣ୍ଣ ଭାବେ କଶ୍ମୀର ଉପରେ ମଧ୍ୟ ଭାରତୀୟଙ୍କର ଅଧିକାର ରହିବା ଉଚିତ୍ ବୋଲି କମାଲ କହିଛନ୍ତି। ତେବେ କମାଲଙ୍କ ଏହି ଟୁଇଟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଟୁଇଟରେ ୟୁଜର୍ସମାନେ କମେଣ୍ଟ କରି ନିଜର ସହମତି ଜଣାଇଛନ୍ତି।
