ଭୁବନେଶ୍ୱର,୧୬।୧୦(ବ୍ୟୁରୋ): ବୁଧବାର ବରିଷ୍ଠ ଭାଜପା ନେତା ଦାମୋଦର ରାଉତ ଦଳରୁ ଇସ୍ତଫା ଦେବା ପରେ ରାଜ୍ୟ ରାଜନୀତି ସରଗରମ। ଏହାକୁ ନେଇ ପୁଅ ତଥା ପାରାଦୀପ ବିଧାୟକ ସମ୍ବିତ ରାଉତରାୟ ପ୍ରତିକ୍ରିୟା ରଖି ଦାମ ଭାଜପାକୁ ଯିବା ନିଷ୍ପତ୍ତି ଭୁଲ ଥିଲା ବୋଲି କହିଥିଲେ। ଏହାପରେ ଝିଅ ପ୍ରୀତିନନ୍ଦା ରାଉତରାୟ କହିଛନ୍ତି, ଭାଜପାରେ ମିଶିବା ବାପାଙ୍କ ନିଷ୍ପତ୍ତି ଥିଲା। ଏବେ ଛାଡ଼ିବା ମଧ୍ୟ ତାଙ୍କ ନିଷ୍ପତ୍ତି। ସେ କହୁଥିଲେ, ତାଙ୍କୁ ଦଳରେ ଅଣଦେଖା କରାଯାଇଛି। ଏଣୁ ଯାହା ଚାହୁଁଛନ୍ତି ତାହା କରନ୍ତୁ ବୋଲି ଆମେ କହିଥିଲୁ ବୋଲି ସେ କହିଛନ୍ତି। ସେହିଭଳି ବିଜେଡିରୁ ପୁଣି ନିମନ୍ତ୍ରଣ ଆସିଲେ ଦାମ ଯିବେ କି ପ୍ରଶ୍ନରେ ସେ କହିଛନ୍ତି, ସେ ବିଜେଡିକୁ ଯିବା ନେଇ ଦଳର ସୁପ୍ରିମୋ ଯାହା କହିପାରିବେ।
ପ୍ରକାଶଯୋଗ୍ୟ, ଦାମ ଦଳରୁ ଇସ୍ତଫା ଦେବା ପରେ ନିଜର ଇସ୍ତଫାପତ୍ର ଭାଜପା ରାଜ୍ୟ ସଭାପତି ବସନ୍ତ ପଣ୍ଡାଙ୍କ ପାଖକୁ ପଠାଇ ଦେଇଛନ୍ତି। ସେ ଭାଜପା ଉପରେ କ୍ଷୋଭ ପ୍ରକାଶ କରି କହିଛନ୍ତି, ନିଜକୁ ଦଳରେ ଅଲୋଡ଼ା ମନେ କରୁଛି। ନିର୍ବାଚନ ପରେ ଏବେ ଦଳୀୟ କାର୍ଯ୍ୟକ୍ରମରେ ମୋ ଉପସ୍ଥିତିକୁ କେହି ଆବଶ୍ୟକ ମନେ କରୁନାହାନ୍ତି। ୩୫ ବର୍ଷ ଧରି ବିଧାୟକ, ୬ଥର ମନ୍ତ୍ରୀ ହେବା ପରେ ବି ନିଜକୁ ଅଲୋଡ଼ା ଭାବୁଛି। ଏହା ମୋ ଭିତରେ ମାନସିକ ଅସନ୍ତୁଳନ ସୃଷ୍ଟି କରୁଛି। ଏଣୁ ସକ୍ରିୟ ରାଜନୀତିରୁ ସେ ସମ୍ପୂର୍ଣ୍ଣ ଅବ୍ୟାହତି ନେବାକୁ ବାଧ୍ୟ ହେଉଥିବା ଦାମ କହିଛନ୍ତି।
