କୁଆଁରମୁଣ୍ଡା,୨୨।୮(ଡି.ଏନ.ଏ.)-ସୁନ୍ଦରଗଡ଼ ଜିଲା ବୀରମିତ୍ରପୁର-ସଲଙ୍ଗାବାହାଲ ପୂର୍ତ୍ତ ବିଭାଗ ରାସ୍ତାର ସଲଙ୍ଗାବାହାଲ ବଜାର ନିକଟରେ ଅବସ୍ଥା ଅତି ଶୋଚନୀୟ ହୋଇପଡ଼ିଛି। ଗତ ପ୍ରାୟ ୨ ମାସରୁ ଊର୍ଦ୍ଧ୍ୱ ହେଲା ରାସ୍ତା ମରଣଯନ୍ତା ପାଲଟି ଥିଲେ ମଧ୍ୟ ବିଭାଗ ପକ୍ଷରୁ ଏହାର ମରାମତି କାର୍ଯ୍ୟ କରାଯାଉ ନ ଥିଲା। ଫଳରେ ଉକ୍ତ ରାସ୍ତା ଦେଇ ବସ୍, ଟ୍ରକ ଠାରୁ ଆରମ୍ଭ ଆରମ୍ଭ କରି ବାଇକ୍ ଯାତାୟାତରେ ବହୁ ସମସ୍ୟା ହେଉଥିଲା। ଉକ୍ତ ବଜାର ନିକଟବର୍ତ୍ତୀ ଅଞ୍ଚଳରେ ଥିବା ଉକ୍ତ ରାସ୍ତାର ୪ରୁ ୫ଟି ଖାଲ ଚଳିତ ବର୍ଷାଋତୁରେ ଗାଡ଼ିଆ ଆକାର ଧାରଣ କରିଥିଲା। ସାଧାରଣ ପଥଚାରୀ ଉକ୍ତ ରାସ୍ତା ଦେଇ ଯାତାୟାତ କରିବା ମଧ୍ୟ ସମ୍ଭବ ହେଉ ନ ଥିଲା। ଏହି ଅବସ୍ଥାରେ ସାଧାରଣ ଲୋକେ ସବୁଦିନ ଅଭିଯୋଗ କରୁଥିଲେ ମଧ୍ୟ ବିଭାଗ ପକ୍ଷରୁ ଏହାର ମରାମତି କାର୍ଯ୍ୟ କରାଯାଉ ନ ଥିଲା। ଏପରି ଅବସ୍ଥାରେ ଏହି ରାସ୍ତାର ମରାମତି କାର୍ଯ୍ୟ ପୋଲିସ କର୍ମଚାରୀ କରାଇଛନ୍ତି। ସ୍ଥାନୀୟ ରାଏବୋଗା ଥାନା କର୍ମଚାରୀମାନେ ସ୍ବତଃସ୍ପୁର୍ତ୍ତଭାବେ ଗୁରୁବାର ଏପରିକରି ସାମାଜିକ କାର୍ଯ୍ୟର ଉଦାହରଣ ସୃଷ୍ଟି କରିଛନ୍ତି। ରାଏବୋଗା ଥାନା ଅଧିକାରୀ ବିଜୟ କୁମାର ସିଂଙ୍କ ତତ୍ତ୍ୱାବଧାନରେ ପୋଲିସ କର୍ମଚାରୀମାନେ ଲୋକ ଲଗାଇ ମରାମତି କରିଥିଲେ। ସଲଙ୍ଗାବାହାଲ ନିକଟବର୍ତ୍ତୀ ଉକ୍ତ ରାସ୍ତାରେ ସୃଷ୍ଟି ହୋଇଥିବା ଖାଲଖମାଗୁଡିକରେ ବୋଲଡର ପକାଇ ପୋତିବା ଯୋଗୁ ଯାତାୟାତ ବ୍ୟବସ୍ଥା ସୁଗମ ହୋଇଛି। ଫଳରେ ଉକ୍ତ ରାସ୍ତା ଦେଇ ଏବେ ଗାଡି ଚଳାଚଳ ଠାରୁ ଆରମ୍ଭ କରି ପଥଚାରୀମାନେ ଖୁସିରେ ଯାତାୟାତ କରିପାରୁଛନ୍ତି।
