ଆନନ୍ଦପୁର,୧୭। ୫(ସ୍ବ.ପ୍ର.)-କେନ୍ଦୁଝର ଜିଲା ଆନନ୍ଦପୁର ବାସିନ୍ଦା ରାମ ଜେନାଙ୍କ ପୁଅ ଅରୁଣ ଜେନା ସାଇକେଲ ଯୋଗେ ମହାରାଷ୍ଟ୍ରର ପୁନେ ଅଞ୍ଚଳରୁ ଆସି ରବିବାର ଘରେ ପହଞ୍ଚିଛନ୍ତି। ଅରୁଣ ରୋଜଗାର କରିବା ପାଇଁ ପୁନେ ଅଞ୍ଚଳରେ ଏକ ଘରୋଇ କମ୍ପାନୀରେ କାମ କରୁଥିଲେ। ଲକଡାଉନ ଘୋଷଣା ହେବା ପରେ କମ୍ପାନୀରୁ ଯାହା କିଛି ଟଙ୍କା ପାଇଥିଲେ ସେଥିରେ ଚଳିବାକୁ ଚେଷ୍ଟା କରିଥିଲେ। ହେଲେ ଟଙ୍କା ସରିଯିବା ପରେ କମ୍ପାନୀ ଆଉ ଅଧିକ ଅର୍ଥ ଦେବାକୁ ମନା କରିଦେଇଥିଲା। ଶେଷରେ ବାଧ୍ୟ ହୋଇ ସେ ନିଜ ଘରକୁ ଫେରିବାକୁ ଚେଷ୍ଟା କରିଥିଲେ। ପାଖରେ ଅର୍ଥ ନ ଥିବାରୁ ସେ ନିଜ ଘରକୁ ଅର୍ଥ ପଠାଇବା ପାଇଁ କହିଥିଲେ। ପରେ ପରିବାର ଲୋକ ଅର୍ଥ ପଠାଇବାର ବ୍ୟବସ୍ଥା କରିଥିଲେ। ସେହି ଅର୍ଥରେ ସାଇକେଲ ଖଣ୍ଡେ କିଣି ନିଜର ଘର ଅଭିମୁଖେ ବାହାରିଥିଲେ। ଦୀର୍ଘ ୯ ଦିନ ଯାତ୍ରା ପରେ ରବିବାର ଅରୁଣ ଆନନ୍ଦପୁରରେ ପହଞ୍ଚିଥିବା ପ୍ରକାଶ କରିଛନ୍ତି। ସ୍ଥାନୀୟ ପ୍ରଶାସନ ପକ୍ଷରୁ ତାଙ୍କୁ କ୍ୱାରାଣ୍ଟାଇନରେ ରଖାଯାଇଛି।
