ଭୁବନେଶ୍ୱର,୧୩ା୬(ବ୍ୟୁରୋ): ରାଜଧାନୀ ଭୁବନେଶ୍ୱର ଚନ୍ଦ୍ରଶେଖରପୁର ଥାନା ମଣ୍ଡପ ବସ୍ତିରେ ଏକ ହତ୍ୟାକାଣ୍ଡ ଘଟିଛି। ମଦ ନ ଦେବାରୁ ଜଣେ ସାଙ୍ଗ ଅନ୍ୟ ଜଣେ ସାଙ୍ଗକୁ ଏକ କାଠଫାଳିଆରେ ପିଟିପିଟି ହତ୍ୟା କରିଛି। ମୃତ ଯୁବକ ଜଣଙ୍କ ହେଲେ ଚନ୍ଦକା ଅଞ୍ଚଳର ରାହାସ ବେହେରା(୪୦)। ଖବରପାଇ ଶୁକ୍ରବାର ସକାଳୁ ଘଟଣାସ୍ଥଳରେ ପୋଲିସ ଏବଂ ସାଇଣ୍ଟିଫିକ୍ ଟିମ୍ ପହଞ୍ଚତ୍ ତଦନ୍ତ ଆରମ୍ଭ କରିଥିଲେ। ସାଇଣ୍ଟିଫିକ୍ ଟିମ୍ ସେଠାରେ ରକ୍ତ ଲଗା କାଠଫାଳିଆ ଏବଂ ରକ୍ତ ନମୁନା ସଂଗ୍ରହ କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ କ୍ୟାପିଟାଲ ହସ୍ପିଟାଲକୁ ପଠାଇବା ସହ ଅଭିଯୁକ୍ତଙ୍କୁ ଗିରଫ କରିଛି। ଏନେଇ ଆଇପିସି ଦଫା ୩୦୨ରେ ଏକ ମାମଲା(ନଂ-୧୯୩/୨୦) ରୁଜୁ କରାଯାଇ ଗିରଫ ଅଭିଯୁକ୍ତ ମଣ୍ଡପବସ୍ତିର ସନାତନ ମୁଣ୍ଡାଙ୍କୁ କୋର୍ଟ ଚାଲାଣ କରାଯାଇଛି।
ମିଳିଥିବା ସୂଚନା ଅନୁଯାୟୀ, ରାହାସଙ୍କ ଘର ଚନ୍ଦକା ଅଞ୍ଚଳରେ ହୋଇଥିବାବେଳେ ଗାଡ଼କଣରେ ଥିବା ଜଣେ ସମ୍ପର୍କୀୟଙ୍କ ଘରେ ରହି ଦିନମଜୁରିଆ ଭାବେ କାର୍ଯ୍ୟ କରନ୍ତି। ହତ୍ୟାକାରୀ ସନାତନ ଏବଂ ରାହାସ ଉଭୟ ଭଲ ବନ୍ଧୁ। ଗୁରୁବାର ମଧ୍ୟରାତ୍ରିରେ ସନାତନ ମଦ ପିଇବାକୁ ରାହାସଙ୍କୁ ମଣ୍ଡପବସ୍ତିକୁ ଡାକିଥିଲେ। ପୂର୍ବରୁ ଉଭୟ ବହୁବାର ମଦ ପିଇଥିବାରୁ ରାହାସ ଭରସା କରି ଗୁରୁବାର ରାତିରେ ଉକ୍ତ ବସ୍ତିକୁ ଯାଇଥିଲେ। ସେଠାରେ ଉଭୟ ମଦ ମଧ୍ୟ ପିଇଥିଲେ। ସନାତନ ଅଧିକ ମଦ ପିଇବା ପାଇଁ ଜିଦ୍ ଧରିବାରୁ ରାହାସ ମନା କରିଥିଲେ। ଫଳରେ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ସନାତନ ଏକ କାଠଫାଳିଆରେ ରାହାସଙ୍କ ମୁଣ୍ଡକୁ ପିଟି ଦେଇଥିଲେ। ସେ ତଳେ ପଡିଯାଇ ଚିକତ୍ାର କରିଥିଲେ ମଧ୍ୟ ସନାତନ ଛାଡ଼ି ନଥିଲେ। ଶେଷରେ ଘଟଣାସ୍ଥଳରେ ରାହାସଙ୍କ ପ୍ରାଣବାୟୁ ଉଡ଼ିଯାଇଥିଲା। ବିଳମ୍ବିତ ରାତିରେ ଘଟଣା ସମ୍ପର୍କରେ ପୋଲିସ ଖବର ପାଇ ଉକ୍ତ ଜାଗାକୁ ସିଲ୍ କରିଥିଲା। ସକାଳୁ ପୋଲିସ ସେଠାରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ କ୍ୟାପିଟାଲ ହସ୍ପିଟାଲକୁ ପଠାଇଥିଲା।
