ଡେରାଡୁନ,୧୯।୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ନିର୍ବାଚନ ପ୍ରଚାର କାର୍ଯ୍ୟ ଶେଷ କରି ଶନିବାର ବାହାରିଥିଲେ କେଦାରନାଥ ଦର୍ଶନରେ। ସେଠାରେ ସେ ଏକ ଗୁମ୍ଫାରେ ଧ୍ୟାନ କରିବାର ଖବର ସବୁଠି ପ୍ରକାଶ ପାଇଥିଲା। ହେଲେ ମୋଦି ଯେଉଁ ଗୁମ୍ଫାରେ ଧ୍ୟାନ କରୁଥିଲେ ତାହା ସାଧାରଣ ନ ଥିଲା ବୋଲି ଏବେ ସୂଚନା ମିଳିଛି। କାରଣ ସମୁଦ୍ର ପତ୍ତନଠାରୁ ପ୍ରାୟ ୧୨ହଜାର ଫୁଟ ଉପରେ ଥିବା ଏହି ଗୁମ୍ଫାରେ ମୋଦି ଶନିବାର ରାତି ବିତାଇଥିଲେ। ସୂଚନା ମୁତାବକ, ଏହି ଗୁମ୍ଫାଟି ପୂଣ୍ୟପୀଠଠାରୁ ପ୍ରାୟ ୧କିଲୋମିଟର ଉପରେ ଥିବା ପାହାଡ଼କୁ କାଟି ତିଆରି କରାଯାଇଥିଲା। ଏଥିରେ ଏକ ଶୌଚାଗାର ସଂଲଗ୍ନ ଥିବା ସହ ସିସିଟିଭିର ବ୍ୟବସ୍ଥା ରହିଥିଲା ଏହାସହ ଏହାର ଛାତର ଉଚ୍ଚତା ରହିଛି ପାଖାପାଖି ୧୦ ଫୁଟ। ଏହା ଏକ ଐତିହାସିକ ମନ୍ଦିର ସଦୃଶ୍ୟ ଦୃଶ୍ୟମାନ ହେଉଥିଲା। ନେହେରୁ ଇନଷ୍ଟିଚ୍ୟୁଟ ଅଫ୍ ମାଉଣ୍ଟନିୟରିଂ(ଏନ୍ଆଇଏମମ)ର ଜଣେ ଅଧିକାରୀଙ୍କ ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ଉକ୍ତ ଗୁମ୍ଫାକୁ ଗସ୍ତ କରିବାର ବହୁ ପୂର୍ବରୁ ଏହାକୁ ପ୍ରସ୍ତୁତ କରାଯାଇଥିଲା। ବିଜୁଳୀ ଓ ପାଣିର ସଂଯୋଗ ମଧ୍ୟ କରାଯାଇ ସାରିଥିଲା। ତେବେ ମାସ ମାସ ଧରି ପଥର କାଟି ଏହି ଗୁମ୍ଫାକୁ ସ୍ବତନ୍ତ୍ର ଭାବେ ନିର୍ମାଣ କରାଯାଇଥିବା ସେ କହିଛନ୍ତି। ଗତବର୍ଷ ଏହାର କାମ ସମ୍ପୂର୍ଣ୍ଣ ହେବା ପରେ ଏହାକୁ ତାଲା ପକାଇ ବନ୍ଦ କରି ରଖାଯାଇଥିଲା। ମୋଦିଙ୍କ ଗସ୍ତକୁ ଲକ୍ଷ୍ୟ ରଖି ଏଠାରେ ସିସିଟିଭି ଲଗାଯିବା ସହ ଗୁମ୍ଫା ବାହାରେ ସୁରକ୍ଷାକର୍ମୀଙ୍କୁ ନିୟୋଜିତ ମଧ୍ୟ କରାଯାଇଥିଲା। ଏହାସହ ଏଥିରେ ଏକ ବେଡ୍ ରୁମ୍ ସହ ଏକ ଖୋଲା ସ୍ଥାନର ମଧ୍ୟ ବ୍ୟସ୍ଥା କରାଯାଇଥିବା ଅନ୍ୟଜଣେ ଅଧିକାରୀ ସୂଚନା ଦେଇଛନ୍ତି। ଉକ୍ତ ଖୋଲା ସ୍ଥାନରେ ଧ୍ୟାନ କରିହେବା ଭଳି ବ୍ୟବସ୍ଥା ମଧ୍ୟ କରାଯାଇଛି।
