ନୟାଗଡ଼ ଅଫିସ,୨୦ା୧୨: କେନ୍ଦ୍ର ସରକାରଙ୍କ ଦ୍ୱାରା ଗୃହୀତ ହୋଇଥିବା ନାରଗିକତ୍ୱ ସଂଶୋଧନ ଆଇନ (ସିଏଏ)କୁ ନୟାଗଡ଼ ଜିଲାରେ ବିରୋଧ କରାଯାଇଛି। ଏହା ସମ୍ବିଧାନ ବିରୋଧୀ ଓ ଏହାକୁ ପ୍ରତ୍ୟାହାର କରିବା ଦାବିରେ ଗୁରୁବାର ଜିଲା ସିପିଆଇ (ଏମ୍) ଓ ଜନ ଅଧିକାର ସୁରକ୍ଷା ମଞ୍ଚ ମିଳିତ ଭାବେ ଜିଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଛି। ପରେ ଏକ ପ୍ରତିନିଧି ଦଳ ଜିଲାପାଳଙ୍କ ଜରିଆରେ ରାଷ୍ଟ୍ରପତିଙ୍କୁ ଦାବିପତ୍ର ପ୍ରଦାନ କରିଥିଲେ। ପୂର୍ବରୁ ଉଭୟ ସଙ୍ଗଠନର ଶତାଧିକ ସଦସ୍ୟ ସିନ୍ଦୂରିଆଠାରୁ ଶୋଭାଯାତ୍ରାରେ ବାହାରି କେନ୍ଦ୍ର ସରକାର ବିରୋଧରେ ନାରାବାଜି ଦେବା ସହିତ ସିଏଏକୁ ପ୍ରତ୍ୟାହାର କରିନେବା ଧ୍ୱନି ଦେଇ ଜିଲାପାଳଙ୍କ କାର୍ଯ୍ୟାଳୟ ଆଗରେ ପହଞ୍ଚତ୍ଥିଲେ। ସେଠାରେ ବିଶ୍ୱନାଥ ମହାପାତ୍ରଙ୍କ ନେତୃତ୍ୱରେ ଏକ ସଭା କରାଯାଇଥିଲା। ଶରତ ଚନ୍ଦ୍ର ବେହେରା, ଗଙ୍ଗାଧର ପଣ୍ଡା, ସୁରେଶ ସ୍ବାଇଁ, ବୁଦ୍ଧି ନାୟକ, ଏସ୍.ଏ. କରିମ, ଗୋଲକ ବିହାରୀ ମୁଦୁଲି, ସରୋଜ ନାୟକ, ଜନ ଅଧିକାର ସୁରକ୍ଷା ମଞ୍ଚର ନେତା ଏସ୍. ଏ. ଆହାଦ୍, ଉସମାନ ମଲ୍ଲିକ, ଓହିଦ ମଲ୍ଲିକ, କାଳିଆ ଖାନ ପ୍ରମୁଖ ଯୋଗଦେଇ ବକ୍ତବ୍ୟ ରଖିଥିଲେ। ଭାରତରେ ସମସ୍ତେ ଭାଇ ଭାଇ ହୋଇ ଚଳୁଥିବା ବେଳେ ଏହି ଆଇନ ଦ୍ୱାରା ଲୋକମାନଙ୍କ ମଧ୍ୟରେ ସାମ୍ପ୍ରଦାୟିକ ମନୋଭାବ ଦେଖାଦେବ ବୋଲି ବିକ୍ଷୋଭକାରୀମାନେ ପ୍ରକାଶ କରିଥିଲେ।
