ସଜନାଗଡ଼, ୧୨।୮(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ଥାନା ଅଧୀନ କେଶୁରା ଗ୍ରାମରେ ବିଜୟ କୁମାର ସିଂହ (୪୦) ନାମକ ଜଣେ ସିକ୍ୟୁରିଟି ଗାର୍ଡଙ୍କୁ ହତ୍ୟା କରାଯିବା ଘଟଣାର ପର୍ଦ୍ଦାଫାଶ ହୋଇଛି। ପରକୀୟା ପ୍ରୀତି ସନ୍ଦେହକୁ ନେଇ ଏଭଳି ହତ୍ୟାକାଣ୍ଡ ଘଟିଥିବା ରବିବାର ପୂର୍ବାହ୍ନରେ ନୀଳଗିରି ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଏସ୍ପି ବି. ଯୁଗଳ କିଶୋର କୁମାର ସୂଚନା ଦେଇଛନ୍ତି। ପାରିପାର୍ଶ୍ୱିକ ସ୍ଥିତି, ଗ୍ରାମବାସୀଙ୍କ ସାକ୍ଷ୍ୟ ପ୍ରମାଣ ଏବଂ ବିଜୟଙ୍କୁ ହତ୍ୟା କରିଥିବା ନେଇ ସ୍ବୀକାରୋକ୍ତି ପରେ ଅଭିଯୁକ୍ତ ଗୌରୀଶଙ୍କର ରାଉତ(୩୨)ଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଛି। ଏନେଇ ଥାନାରେ ଏକ ହତ୍ୟା ମାମଲା (ନଂ. ୧୮୩/୧୯) ରୁଜୁ କରାଯାଇଛି।
ଖବରଦାତାଙ୍କୁ ଏହି ସୂଚନା ଦେବା ବେଳେ ଏସ୍ପି କହିଥିଲେ, ଅଭିଯୁକ୍ତ ଗୌରୀଶଙ୍କର ଓ ବିଜୟଙ୍କ ଘର ପାଖାପାଖି। ବିଜୟ ବାରମ୍ବାର ଗୌରୀଶଙ୍କରଙ୍କ ଘରକୁ ଯିବା ଆସିବା କରୁଥିବାରୁ ମା’ଙ୍କ ସହ ସେ ପରକୀୟା ସମ୍ପର୍କ ରଖିଥିବା ସନ୍ଦେହ କରି ଆସୁଥିଲେ। ଏଥିଲାଗି ତାଙ୍କ ଘରକୁ ନ ଆସିବା ଲାଗି ଗୌରୀଶଙ୍କର ବାରଣ କରୁଥିଲେ। ହେଲେ ବିଜୟ ଏଥିପ୍ରତି ଗୁରୁତ୍ୱ ନ ଦେବାରୁ ସେ ପ୍ରତିଶୋଧପରାୟଣ ହୋଇ ତାଙ୍କୁ ହତ୍ୟା କରିବାକୁ ଯୋଜନା କରି ସୁଯୋଗ ଅପେକ୍ଷାରେ ଥିଲେ। ଶୁକ୍ରବାର ବିଜୟ ତାଙ୍କ ସ୍ତ୍ରୀଙ୍କୁ ସଜନାଗଡ଼ସ୍ଥିତ ବାପ ଘରେ ଛାଡ଼ିଦେଇ ଆସି ନିଶାସକ୍ତ ଅବସ୍ଥାରେ ରାତିରେ ଘରେ ଶୋଇଥିଲେ। ଏହାକୁ ସୁଯୋଗ ମନେକରି ଗୌରୀଶଙ୍କର ତାଙ୍କ ଘରେ ପଶି ଏକ ଧାରୁଆ ଅସ୍ତ୍ରରେ ବିଜୟଙ୍କ ନିମର୍ମ ଭାବେ ହତ୍ୟା କରିଥିଲେ। ଶନିବାର ପୂର୍ବାହ୍ନରେ ପଡୋଶୀ ଲୋକେ ହତ୍ୟାକାଣ୍ଡ ଘଟିଥିବା ଜାଣି ବାପଘରେ ଥିବା ବିଜୟଙ୍କ ସ୍ତ୍ରୀଙ୍କ ପାଖକୁ ଖବର ଦେଇଥିଲେ। ସେ ଓ ତାଙ୍କ ଭାଇ ଘଟଣାସ୍ଥଳରେ ପହଞ୍ଚତ୍ ବିଜୟଙ୍କୁ ହତ୍ୟା କରାଯାଇଥିବା ଜାଣି ନୀଳଗିରି ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ୍ ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ସହ ପହଞ୍ଚତ୍ ମୃତଦେହ ଜବତ କରି ତଦନ୍ତ ଆରମ୍ଭ କରିଥିଲା। ହେଲେ ଘଟଣା ରହସ୍ୟଘେରରେ ଥିବାରୁ ପୋଲିସ ପାରିପାର୍ଶ୍ୱିକ ସ୍ଥିତିକୁ ନେଇ ସନ୍ଦେହରେ ୪ରୁ ୫ ଜଣ ଯୁବକଙ୍କୁ ଅଟକ ରଖି ପଚରାଉଚରା ଜାରି ରଖିଥିଲା। ପଡ଼ୋଶୀ ଗୌରୀଶଙ୍କରଙ୍କୁ ଧରି ପୋଲିସ ପଚରାଉଚୁରା କରିବାରୁ ଘଟଣା ପଦାକୁ ଆସିଥିଲା। ତାଙ୍କ ମା’ ସହିତ ବିଜୟଙ୍କ ପରକୀୟା ସମ୍ପର୍କକୁ ନେଇ ସେ ଏଭଳି ହତ୍ୟା ଘଟାଇଥିବା ସ୍ବୀକାର କରିବା ସହ ହତ୍ୟାକାଣ୍ଡରେ ବ୍ୟବହୃତ କଟୁରୀ ଓ ଭୁଜାଲିକୁ ନିକଟସ୍ଥ ଏକ ପୋଖରୀରେ ଫିଙ୍ଗି ଦେଇଥିବା ବୟାନ ଦେଇଥିଲେ। ଏହାପରେ ପୋଲିସ ସେହି ପୋଖରୀରୁ ଭୁଜାଲି ଓ କଟୁରୀ ଉଦ୍ଧାର କରିଥିବା ଏସ୍ପି କହିଛନ୍ତି।
