ଆଙ୍କାରା,୧୮-୧୦(ଏଏଫ୍ପି):ଆମେରିକା ଉପରାଷ୍ଟ୍ରପତି ମାଇକ୍ ପେନ୍ସ ଗୁରୁବାର ସିରିଆରେ ଅସ୍ତ୍ରବିରତି ପାଇଁ ତୁର୍କୀକୁ ରାଜି କରାଇଛନ୍ତି। ସେ ତୁର୍କୀ ରାଷ୍ଟ୍ରପତି ରେସେପ୍ ତେୟିପ୍ ଏର୍ଡୋଗାନ୍ଙ୍କୁ ଭେଟି କୁର୍ଦ୍ଦିଶ ବଳ ଉପରେ ସାମରିକ ବଳ ରୋକିବାକୁ ପରାମର୍ଶ ଦେଇଛନ୍ତି। ସମସ୍ତ ସାମରିକ ଅଭିଯାନକୁ ଆସନ୍ତା ୧୨୦ ଘଣ୍ଟା ପର୍ଯ୍ୟନ୍ତ ବନ୍ଦ କରାଯାଇଛି। ଫଳରେ ଆମେରିକା କୁର୍ଦ୍ଦିଶ ବଳକୁ ବ୍ୟବସ୍ଥିତ ଉପାୟରେ ପ୍ରତ୍ୟାହାର କରିବାରେ ସହଯୋଗ କରିବ। ସିରିଆର ଉତ୍ତର ସୀମାର ସେହି ଅଞ୍ଚଳରୁ କୁର୍ଦ୍ଦିଶ ବଳକୁ ଆମେରିକା ହଟାଯାଉଛି, ଯେଉଁଠି ତୁର୍କୀ ‘ସେଫ୍ ଜୋନ୍’ ନିର୍ମାଣ କରିବାକୁ ଚାହୁଁଥିଲା। ଗତ ସପ୍ତାହରେ ତୁର୍କୀ ଏହି ଅଭିଯାନ ଆରମ୍ଭ କରିଥିଲା। ଏହାର ଉଦ୍ଦେଶ୍ୟ ଥିଲା କୁର୍ଦ୍ଦିଶ ବଳକୁ ସୀମାରୁ ପଛକୁ ଘୁଞ୍ଚାଇ ସିରିଆ ଶରଣାର୍ଥୀଙ୍କ ପାଇଁ ନିରାପଦ ଜୋନ୍ ତିଆରି କରିବା। ଏହି ଘୋଷଣା ପରେ ‘ଲକ୍ଷ ଲକ୍ଷ ଜୀବନ ବଞ୍ଚତ୍ୟିବ’ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଟୁଇଟ୍ କରିଛନ୍ତି। ଆମେରିକା ଉପରାଷ୍ଟ୍ରପତି ମାଇକ୍ ପେନ୍ସ ଓ ପରରାଷ୍ଟ୍ର ସଚିବ ମାଇକ୍ ପମ୍ପିଓଙ୍କ ଆଙ୍କାରା ଗସ୍ତ ପୂର୍ବରୁ ଟ୍ରମ୍ପ୍ ତାଙ୍କ ତୁର୍କୀ ପ୍ରତିପକ୍ଷ ଏର୍ଡୋଗାନ୍ଙ୍କ ନିକଟକୁ ଏକ ପତ୍ର ଲେଖିଥିଲେ। ଏଥିରେ ସେ ତାଙ୍କୁ ‘ବୋକା ହୁଅନାହିଁ’ ବୋଲି ଚେତାବନୀ ଦେଇଥିଲେ। ତେବେ ଏର୍ଡୋଗାନ୍ ଉକ୍ତ ପତ୍ରକୁ ଡଷ୍ଟବିନ୍କୁ ଫିଙ୍ଗି ଦେଇଥିବା ଜଣାପଡ଼ିଛି। ପ୍ରକାଶ ଯେ, ତୁର୍କୀର ସିରିଆ ଆକ୍ରମଣ ପରେ ଗତ ୮ ଦିନ ମଧ୍ୟରେ ଉଭୟ ପକ୍ଷର ୭୨ ନାଗରିକ ଓ ୪୦୦ରୁ ଊର୍ଦ୍ଧ୍ୱ ଯୋଦ୍ଧା ନିହତ ହେଲେଣି।
