ବୁଗୁଡ଼ା,୨୯ା୪(ଡି.ଏନ୍.ଏ.): ସୁରଟରୁ ଦୀର୍ଘ ୧୮୦୦ କିଲୋମିଟର ରାସ୍ତା ସାଇକେଲ ଚଲାଇ ବୁଗୁଡ଼ା ଥାନା ଅନ୍ତର୍ଗତ ବିଷ୍ଣୁଚକ୍ରରେ ମଙ୍ଗଳବାର ସନ୍ଧ୍ୟାରେ ପହଞ୍ଚିଥିଲେ ଦୁର୍ଯ୍ୟୋଧନ ପ୍ରଧାନ। ବର୍ତ୍ତମାନ ଦେଶରେ ଲକ୍ଡାଉନ୍ ଯୋଗୁ ସୁରଟରେ କମ୍ପାନୀ ବନ୍ଦ ହେବା ପରେ ସେ କୌଣସି କାମଧନ୍ଦା ନ ପାଇ ଅସୁବିଧାର ସମ୍ମୁଖୀନ ହୋଇଥିଲେ। ଅନ୍ୟପକ୍ଷରେ ଚାରିଆଡ଼େ ଯାନବାହନ ଚଳାଚଳ ବନ୍ଦ ହେବାରୁ ସେ ବାଧ୍ୟହୋଇ ଏକ ସାଇକେଲରେ ଏପ୍ରିଲ ୧୫ରେ ସୁରଟରୁ ବାହାରି ଦୀର୍ଘ ୧୮୦୦ କିଲୋମିଟର ରାସ୍ତା ଅତିକ୍ରମ କରି ୧୫ଦିନ ପରେ ନିଜ ଗାଁ ବିଷ୍ଣୁଚକ୍ରରେ ପହଞ୍ଚିଛନ୍ତି। ତେବେ ଗ୍ରାମର ଲୋକମାନେ ତାଙ୍କୁ ଗାଁରେ ପୂରାଇ ଦେଇ ନ ଥିଲେ। ସରପଞ୍ଚଙ୍କ ହସ୍ତକ୍ଷେପ ପରେ ଦୁର୍ଯ୍ୟୋଧନଙ୍କୁ ବିଷ୍ଣୁଚକ୍ର ଉଚ୍ଚ ପ୍ରାଥମିକ ବିଦ୍ୟାଳୟର ସଙ୍ଗରୋଧ କେନ୍ଦ୍ରରେ ରଖାଯାଇଛି। ତାଙ୍କୁ ସେଠାରେ ୧୪ଦିନ ରଖାଯାଇ ସ୍ବାସ୍ଥ୍ୟ ପରୀକ୍ଷା କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
