ଲଣ୍ଡନ/ନୂଆଦିଲ୍ଲୀ,୧୧।୪: କରୋନା ସଂକ୍ରମଣ ଯୋଗୁ ପ୍ରତିଦିନ ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। କେତେକ କରୋନା ସଂକ୍ରମିତ ସୁସ୍ଥ ହେବା ପରେ ବି ତାଙ୍କ ରିପୋର୍ଟ ପଜିଟିଭ ଆସୁଛି। ଏହାକୁ ନେଇ କରୋନା ଭଲ ହେଉଛି କି ନାହିଁ ସେ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଆମେରିକା ଟେକ୍ସାସ୍ ବିଶ୍ୱବିଦ୍ୟାଳୟର ବାୟୋଲୋଜିଷ୍ଟ ଡ. ବିନିତ୍ ମେନାଞ୍ଚରିଙ୍କ ଅନୁସାରେ କରୋନାରୁ ସୁସ୍ଥ ହେବା ପୂର୍ବରୁ କରାଯାଉଥିବା ରିପୋର୍ଟରେ ଯଦି ନେଗେଟିଭ୍ ଆସୁଛି ମାତ୍ର ପରେ ଏହା ପଜିଟିଭ୍ ଆସୁଛି। ଏଥିରୁ ଜାଣିଯିବା ଆବଶ୍ୟକ ଯେ ପୁରୁଣା ରିପୋର୍ଟ ଭୁଲ୍ ଥିଲା। କାରଣ ସଂକ୍ରମିତଙ୍କ ଶରୀରରେ ୭ରୁ ୧୦ ଦିନ ମଧ୍ୟରେ କରୋନା ଭୂତାଣୁ ବିରୋଧରେ ଆଣ୍ଟିବଡ଼ି ତିଆରି ହେବା ଆରମ୍ଭ ହୋଇଥାଏ। ତେଣୁ ସୁସ୍ଥ ହୋଇଥିବା ଲୋକଙ୍କ ରିପୋର୍ଟ ପଜିଟିଭ ଆସିବା କଥା। ସୁସ୍ଥ ହୋଇଥିବା ବ୍ୟକ୍ତିଙ୍କ ଶରୀରରେ କରୋନା ଭୂତାଣୁ ବିରୋଧରେ ସୃଷ୍ଟି ହୋଇଥିବା ଆଣ୍ଟିବଡ଼ି ୨ରୁ ୩ ବର୍ଷ ପର୍ଯ୍ୟନ୍ତ ସକ୍ରିୟ ରହିଥାଏ। ତେବେ ବ୍ୟକ୍ତିଙ୍କ ରୋଗ ପ୍ରତିରୋଧକ ଶକ୍ତି ଉପରେ ଏହା ନିର୍ଭର କରେ। ଆଣ୍ଟିବଡ଼ିର ଉପସ୍ଥିତି ଯୋଗୁ ବେଳେବେଳେ ସୁସ୍ଥ ବ୍ୟକ୍ତିଙ୍କ ରିପୋର୍ଟ ମଧ୍ୟ ପଜିଟିଭ ଆସୁଥିବା ମେନାଞ୍ଚରି କହିଛନ୍ତି। ଅପରପକ୍ଷରେ ହଂକଂ ବିଶ୍ୱବିଦ୍ୟାଳୟର ରେସ୍ପେଟୋରୀ ମେଡିସିନ୍ ବିଶେଷଜ୍ଞ ପ୍ରଫେସର ଡେଭିଡ୍ ହୁଇଙ୍କ ଅନୁସାରେ ସୁସ୍ଥ ହୋଇଥିବା ଲୋକଙ୍କ ଶରୀରରେ କରୋନା ଆର୍ଏନ୍ଏ କିଛି ମାତ୍ରାରେ ରହିଥାଏ। ମାତ୍ର ଏହା ଯୋଗୁ ସଂକ୍ରମଣ ହେବାର ଆଶଙ୍କା ନ ଥାଏ। ଆର୍ଏନ୍ଏ ଥିବାରୁ ହୁଏତ ରିପୋର୍ଟ ପଜିଟିଭ୍ ଆସୁଥିବାର ସେ ଅନୁମାନ କରିଛନ୍ତି। କିନ୍ତୁ ସୁସ୍ଥ ହୋଇଥିବା ଲୋକଙ୍କ ମଧ୍ୟରେ ସଂକ୍ରମଣ ହେବାର ଆଶଙ୍କା ମଧ୍ୟ ରହିଥାଏ। ମାଙ୍କଡ଼ଙ୍କ କ୍ଷେତ୍ରରେ ହୋଇଥିବା ପ୍ରୟୋଗ ଏହା ଜଣାପଡ଼ିଛି। କିଛି ସୁସ୍ଥ ମାଙ୍କଡ଼ଙ୍କଠାରେ ପୁଣିଥରେ ସଂକ୍ରମଣ ହୋଇଥିବା ହୁଇ ସୂଚନା ଦେଇଛନ୍ତି।
