ଜୁନାଗଡ,୧୪।୪(ଡି.ଏନ୍.ଏ): କଳାହାଣ୍ଡି ଜିଲା ଜୁନାଗଡ ବ୍ଲକ ସନ୍ୟାସୀ କୁଣ୍ଡାମାଲ ପଞ୍ଚାୟତ ବାଞ୍ଜିନାଳପଡା ପ୍ରାଥମିକ ବିଦ୍ୟାଳୟରେ ସୋମବାର ରାତିରେ ଚୋରି ହୋଇଛି। ଦୁର୍ବୃତ୍ତମାନେ ଅଫିସ୍ର ତାଲା ଭାଙ୍ଗି ସେଠାରେ ଥିବା ଚାଉଳ ଓ ଖେଳଣା ସାମଗ୍ରୀ ଚୋରି କରିନେଇଛନ୍ତି। ମଙ୍ଗଳବାର ସକାଳରେ ସ୍କୁଲ କର୍ତ୍ତୃପକ୍ଷ ଘଟଣା ସମ୍ପର୍କରେ ଜାଣିବା ପରେ ଜୁନାଗଡ ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଏ ନେଇ ଜୁନାଗଡ ଥାନାରେ ଏକ ମାମଲା ରୁଜୁ କରିବା ସହ ପ୍ରାଥମିକ ତଦନ୍ତ ଆରମ୍ଭ କରିଛି।
ବାଞ୍ଜିନାଳପଡା ଅଫିସ କାର୍ଯ୍ୟାଳୟରେ ଛାତ୍ରୀଛାତ୍ରଙ୍କ ମଧ୍ୟାହ୍ନ ଭୋଜନ ପାଇଁ ୧କୁଇଣ୍ଟାଲ ୪୨କିଗ୍ରା ଚାଉଳ, ଚାଉଳ ରଖାଯାଇଥିବା ଷ୍ଟିଲ ଡ୍ରମ ଓ ଖେଳଣା ସାମଗ୍ରୀ ରହିଥିଲା । ସ୍କୁଲ ଛୁଟି ଥିବାରୁ ଏହାର ସୁଯୋଗ ଦେଇ ଦୁର୍ବୃତ୍ତମାନେ ସୋମବାର ରାତିରେ ତାଲା ଭାଙ୍ଗି ଚୋରି ସେସବୁ କରିନେଇଛନ୍ତି। ଏପରିକି ଅଫିସ କାର୍ଯ୍ୟାଳୟରେ ଥିବା ସମସ୍ତ ଶ୍ରେଣୀ ଗୃହର ଚାବି ମଧ୍ୟ ନେଇଯାଇଥିବା ଜଣାପଡିଛି। ମଙ୍ଗଳବାର ସକାଳରେ ସ୍ଥାନୀୟ ଜଣେ ଚାଷୀ ସ୍କୁଲର ତାଲା ଭାଙ୍ଗି ତଳେ ପଡିଥିବା ଦେଖି ସ୍କୁଲ କର୍ତ୍ତୃପକ୍ଷଙ୍କୁ ଜଣାଇଥିଲେ। ଏହାପରେ ସ୍କୁଲ କର୍ତ୍ତୃପକ୍ଷ ଘଟଣାସ୍ଥଳକୁ ଆସି ଦେଖିଲା ପରେ ଜୁନାଗଡ ଥାନାରେ ଏତଲା ଦେଇଥିଲେ। ସେହିପରି ସେଠାରେ ଥିବା ଏକ ପାନ ଦୋକାନରୁ ମଧ୍ୟ ଦୁର୍ବୃତ୍ତମାନେ ତାଲା ଭାଙ୍ଗି କିଛି ସାମଗ୍ରୀ ଚୋରି କରି ନେଇଥିବା ଜଣାପଡିଛି। ଏହାସହ ସେମାନେ ଉକ୍ତ ରାତିରେ ନିକଟିସ୍ଥ ଛୋରିଆଗଡ ଗ୍ରାମର ୩ ନଂ. ଅଙ୍ଗନୱାଡି କେନ୍ଦ୍ରର ତାଲା ଭାଙ୍ଗି ପଶିଥିବା ଜଣାପଡଛି । ତେବେ ସେଠାରେ କୌଣସି ସାମଗ୍ରୀ ନ ଥିବାରୁ ଚୋରି ହୋଇ ନ ଥିଲା। କେବଳ ଛୋଟପିଲାଙ୍କ ଖେଳଣା ସାମଗ୍ରୀ ଗୁଡିକୁ ଦୁର୍ବୃତ୍ତମାନେ ଏଣେତେଣେ ଫିଙ୍ଗିଦେଇଥିବା ଦେଖିବାକୁ ମିଳିଥିଲା।
