ନୂଆଦିଲ୍ଲୀ,୧୦।୮-ଭାରତ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଲାଗି ଓ୍ବେଷ୍ଟଇଣ୍ଡିଜ କ୍ରିକେଟ ବୋର୍ଡ ୧୩ ଜଣିଆ ଦଳ ଘୋଷଣା କରିଛି। ଏଥିରେ ସ୍ଥାନ ପାଇଛନ୍ତି ରକିମ କର୍ନଓ୍ବାଲ। ଭାରତ ବିପକ୍ଷରେ ପଦାର୍ପଣ କରିବାକୁ ସୁଯୋଗ ମିଳିଲେ, କର୍ନଓ୍ବାଲ ଅନ୍ତର୍ଜାତୀୟ କ୍ରିକେଟ ଖେଳିଥିବା ବିଶ୍ୱର ସବୁଠୁ ଓଜନିଆ (ମୋଟା) କ୍ରିକେଟର ହୋଇପାରିବେ। ତାଙ୍କ ଓଜନ ଏବେ ୧୪୩ କିଲୋ। ଏହି ଅଲୋଡ଼ା ରେକର୍ଡ ବର୍ତ୍ତମାନ ବରମୁଡା ଖେଳାଳି ଡ୍ବେନ ଲେଭରକଙ୍କ ନାମରେ ରହିଛି, ଯିଏକି ୨୦୦୭ ବିଶ୍ୱକପ୍ରେ ଭାରତ ବିପକ୍ଷରେ ଏକ କ୍ୟାଚ୍ ନେଇ ଚର୍ଚ୍ଚାକୁ ଆସିଥିଲେ। ସେତେବେଳେ ତାଙ୍କ ଓଜନ ଥିଲା ୧୨୭ କିଲୋ। ଏହି ତାଲିକାରେ ପାକିସ୍ତାନର ପୂର୍ବତନ ଅଧିନାୟକ ଇଞ୍ଜାମାମ ଉଲ୍ ହକ୍ (୧୦୩) ମଧ୍ୟ ରହିଛନ୍ତି। କର୍ନଓ୍ବାଲ ଜଣେ ସ୍ପିନ୍ ଅଲରାଉଣ୍ଡର। ଗତ ୫ ବର୍ଷ ହେଲା ସେ ଘରୋଇ କ୍ରିକେଟରେ ବହୁ ସଫଳତା ପାଇଛନ୍ତି। ଏଥିଯୋଗୁ ତାଙ୍କୁ ଦଳରେ ଚୟନ କରାଯାଇଛି।
