ହଂକଂ,୧୯ା୮: ହଂକଂରେ ୧୧ ସପ୍ତାହ ହେଲା ସରକାର ବିରୋଧୀ ଆନ୍ଦୋଳନ ଜାରି ରହିଛି। ରବିବାର ପ୍ରବଳ ବର୍ଷା ସତ୍ତ୍ୱେ ୧୦ ଲକ୍ଷରୁ ଊର୍ଦ୍ଧ୍ୱ ବିକ୍ଷୋଭକାରୀ ଛତାଧରି ଭିକ୍ଟୋରିଆ ପାର୍କରୁ ଶୋଭାଯାତ୍ରାରେ ବାହାରିଥିଲେ। ୨ ମାଇଲ ବ୍ୟାପୀ ବିଶାଳ ଶୋଭାଯାତ୍ରା ଶାନ୍ତିପୂର୍ଣ୍ଣ ଭାବେ ଅନୁଷ୍ଠିତ ହୋଇଥିଲା। ହଜାର ହଜାର ବିକ୍ଷୋଭକାରୀ ରାସ୍ତା ପାର୍ଶ୍ୱରେ ରାତି କଟାଇଛନ୍ତି। କିଛି ମାସ ହେଲା ପ୍ରତି ରବିବାର ଗଣତନ୍ତ୍ର ସପକ୍ଷବାଦୀ ବିକ୍ଷୋଭକାରୀମାନେ ଶୋଭାଯାତ୍ରାରେ ସାମିଲ ହେଉଛନ୍ତି। ଅନେକ ସମୟରେ ବିକ୍ଷୋଭକାରୀ ଓ ପୋଲିସ ମଧ୍ୟରେ ଧସ୍ତାଧସ୍ତିରୁ ହିଂସାକାଣ୍ଡ ସୃଷ୍ଟି ହେଉଛି। ତେବେ ଏଥର ସେଭଳି କୌଣସି ଭୟର ବାତାବରଣ ସୃଷ୍ଟି ହେବ ନାହିଁ ବୋଲି ଆୟୋଜକ ବୋନି ଲେଉଙ୍ଗ୍ ର଼୍ୟାଲି ପୂର୍ବରୁ ଆଶାବ୍ୟକ୍ତ କରିଥିଲେ।
ଜୁନ୍ରୁ ଇତିମଧ୍ୟରେ ଲେଉଙ୍ଗ୍ଙ୍କ ସିଭିଲ୍ ହ୍ୟୁମ୍ୟାନ୍ ରାଇଟ୍ସ ଫ୍ରଣ୍ଟ ହଂକଂରେ ତିନୋଟି ବିଶାଳ ରାଲି ଆୟୋଜନ କଲାଣି । ପୋଲିସ ରାଲି ପାଇଁ ଅନୁମତି ଦେଉଥିବାବେଳେ ଶୋଭାଯାତ୍ରା ପାଇଁ ସୁଯୋଗ ଦେଉ ନ ଥିବାରୁ ସଂଘର୍ଷ ହେଉଛି। ରାଲି ସ୍ଥଳରେ ପର୍ଯ୍ୟାପ୍ତ ସ୍ଥାନ ନ ଥିବାରୁ ବିକ୍ଷୋଭକାରୀ ରାସ୍ତାରେ ରୁଣ୍ଡ ହେଉଥିବା ଜଣେ ଆନ୍ଦୋଳନକାରୀ କହିଛନ୍ତି। ଅଧିକ ଲୋକ ହେବା ଆଶଙ୍କାରେ ଟ୍ରେନ୍ଗୁଡିକ ବିକ୍ଷୋଭସ୍ଥଳ ନିକଟବର୍ତ୍ତୀ ଷ୍ଟେଶନରେ ଅଟକୁ ନାହିଁ। ହଂକଂରେ ଗଣତନ୍ତ୍ର ସପକ୍ଷବାଦୀ ଆନ୍ଦୋଳନକୁ ଆମେରିକାର ଆଇନ ପ୍ରଣେତାମାନେ ସମର୍ଥନ କରିଥିବାବେଳେ ବେଜିଂ ପକ୍ଷରୁ ଏହାର ନିନ୍ଦା କରାଯାଇଛି। ଅଳ୍ପ ସଂଖ୍ୟକଙ୍କ ହିଂସାତ୍ମକ ପ୍ରତିବାଦକୁ ହଂକଂର ୭୫ ଲକ୍ଷ ଜନସାଧାରଣ ଓ ଚାଇନାବାସୀ ପ୍ରତ୍ୟାଖ୍ୟାନ କରିଥିବା ଚାଇନା ପାର୍ଲାମେଣ୍ଟ ମୁଖପାତ୍ର ୟୁ ଓ୍ବେଞ୍ଜେ କହିଛନ୍ତି।
