ନୂଆଦିଲ୍ଲୀ,୨୪।୫: ସାରା ବିଶ୍ୱରେ କରୋନା ମହାମାରୀ କାୟାବିସ୍ତାର କରିଚାଲିଛି। ଏହି ମହାମାରୀର ପ୍ରଭାବ ସବୁ ସ୍ତରରେ ଦେଖିବାକୁ ମିଳିଛି। ଆମେରିକା ଭଳି ବିକଶିତ ରାଷ୍ଟ୍ର ଏଥିରୁ ବର୍ତ୍ତିପାରି ନାହିଁ। ଆଇବିଏମ୍ ଭଳି ପ୍ରମୁଖ ମଲ୍ଟିନ୍ୟାଶନାଲ ଟେକ୍ନୋଲୋଜି କମ୍ପାନୀ ଉପରେ ମଧ୍ୟ ଏହାର ପ୍ରଭାବ ପଡିଛି । ଗତ ୨ମାସ ତଳେ ନୂଆ କରି ଦାୟିତ୍ୱ ଗ୍ରହଣ କରିଥିବା କମ୍ପାନୀର ସିଇଓ ଅରବିନ୍ଦ କ୍ରିଷ୍ଣା ଶୁକ୍ରବାର ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, କମ୍ପାନୀ କୋଭିଡ୍-୧୯ ମହାମାରୀ ପାଇଁ ନାନା ସମସ୍ୟାରେ ସମ୍ମୁଖୀନ ହେବା ସହିତ ବାଣିଜି୍ୟକ କ୍ଷତି ମଧ୍ୟ ସୁହାଉଛି । ଏହି କାରଣରୁ କମ୍ପାନୀ ତା’ର ଏକ ହଜାର କର୍ମଚାରୀଙ୍କୁ ଛଟେଇ କରିଥିବା ସୂଚନା ଦେଇଛି। ଏହି କମ୍ପାନୀ ଗତ କିଛି ମାସ ହେଲା ଆର୍ଥିକ ମାନ୍ଦାବସ୍ଥାରେ ସମ୍ମୁଖୀନ ହୋଇଛି । ଛଟେଇର ପ୍ରଭାବ ଭାରତ ଉପରେ ମଧ୍ୟ ପଡିବ ବୋଲି ଜଣାପଡିଛି। ଏହି ମହାମାରୀ କାରଣରୁ କମ୍ପାନୀର ବାଣିଜି୍ୟକ ବ୍ୟବସ୍ଥାରେ ମଧ୍ୟ ବ୍ୟାପକ ଅସ୍ଥିରତା ଦେଖାଦେଇଛି। ଏହି ସଂକ୍ରମଣ ପାଇଁ କମ୍ପାନୀ ତା’ର ଆମେରିକାନ କର୍ମଚାରୀମାନଙ୍କୁ ବିଭିନ୍ନ ସୁବିଧା ପ୍ରଦାନ ସହ ସେମାନଙ୍କର ସ୍ବାସ୍ଥ୍ୟଗତ ସମସ୍ୟା ପାଇଁ ସବ୍ସିଡି ପ୍ରଦାନ କରୁଛି। ଏହି ସୁବିଧା ଜୁନ୍ ୨୦୨୧ ପର୍ଯ୍ୟନ୍ତ ପ୍ରଦାନ କରାଯିବ ବୋଲି କମ୍ପାନୀ ମୁଖପାତ୍ର ସୂଚନା ଦେଇଛନ୍ତି । କମ୍ପାନୀର ଲକ୍ଷ ଲକ୍ଷ କର୍ମଚାରୀ ବିଭିନ୍ନ ରାଜ୍ୟରେ କାର୍ଯ୍ୟ କରୁଛନ୍ତି। କମ୍ପାନୀ ଆସନ୍ତା ଅକ୍ଟୋବର ୩୧ ପର୍ଯ୍ୟନ୍ତ କର୍ମଚାରୀମାନଙ୍କୁ ୨୦ରୁ୨୫% ବେତନ ମୂଳ ଦରମାରୁ କାଟି ପ୍ରଦାନ କରିବ ବୋଲି କୁହାଯାଇଛି।
