ପଦ୍ମପୁର, ୧୩ା୧୧(ଡି.ଏନ୍.ଏ.)- ଭଦ୍ରକ ସଦର ବ୍ଲକଠାରୁ ପ୍ରାୟ ୧୬ କି.ମି.ଦୂର ସାହାଡ଼ାଠାରେ ରହିଛି ଦୀର୍ଘ ୩୦୦ ବର୍ଷର ଲାଲାଜୀ ଗୌଡୀୟ ମଠ। ଶ୍ରୀ ଚୈତନ୍ୟଙ୍କର ଶାସ୍ତ୍ରୀୟ ପରମ୍ପରା ଅନୁଯାୟୀ ସେଠାରେ ଥିବା ରାଧାକୃଷ୍ଣଙ୍କର ପୂଜାର୍ଚ୍ଚନା କରାଯାଇ ଆସୁଛି। ଶ୍ରୀ ଚୈତନ୍ୟଙ୍କ ଓଡ଼ିଶା ଗସ୍ତ ସମୟର ସ୍ମୃତିକୁ ଧରି ରଖିଥିବା ଏହି ପୀଠ ଭକ୍ତି ଓ ଆଧ୍ୟାତ୍ମିକ ଚେତନାର ବାର୍ତ୍ତା ବାଣ୍ଟି ଆସୁଛି। ଏଥର ମଙ୍ଗଳବାର ପ୍ରତ୍ୟୁଷରୁ ମଠର ଆରମ୍ଭ ହୋଇଥିବା ଲାଲାଜୀ ରାହାସ ପୂର୍ଣ୍ଣିମା ଉତ୍ସବ ୯ ଦିନ ଧରି ଚାଲିବ। ପ୍ରଥମ ଦିନରେ ସେଠାରେ ବହୁ ଶ୍ରଦ୍ଧାଳୁଙ୍କ ଭିଡ ଜମିଛି। ପ୍ରାୟ ୧୫୦ ବର୍ଷ ଧରି ପାଳିତ ହୋଇଆସୁଥିବା ଏହି ରାହାସ ମେଳା ଅଞ୍ଚଳବାସୀଙ୍କ ଲାଗି ଆକର୍ଷଣ ସାଜିିିଛି। ଏଥର ମେଳାରେ ବସିଛି ୨୦୦ ରୁ ଊର୍ଦ୍ଧ୍ୱ ଦୋକାନ। ବିଭିନ୍ନ ଘରୋଇ ଉପକରଣ ସାଙ୍ଗକୁ ମୀନାବଜାରର ବିଭିନ୍ନ ବିପଣୀ ଓ ନାନା ଖାଦ୍ୟ ସାମଗ୍ରୀ ବିକ୍ରି ହେଉଛି।
ମେଳାରେ ଅଧିକ ଆକର୍ଷଣ ରହିଛି ପାର୍ଶ୍ୱ ଉପଲକ୍ଷେ ରାଧାକୃଷ୍ଣଙ୍କର ମୃଣ୍ମୟ ପ୍ରତିମୂର୍ତ୍ତି ନିର୍ମାଣ ସହ, ମହାଦେବ ଛଦ୍ମବେଶରେ ଶ୍ରୀକୃଷ୍ଣଙ୍କ ବାଲ୍ୟରୂପ ଦର୍ଶନ କରିବା, ଚୈତନ୍ୟ ମହାପ୍ରଭୁଙ୍କ ଦ୍ୱାରା କାଜୀ ଉଦ୍ଧାର, ଇନ୍ଦ୍ରଙ୍କର ସୁରଭି ଗାଈ ଦ୍ୱାରା ଶ୍ରୀକୃଷ୍ଣଙ୍କ ଅଭିଷେକ, ଶ୍ରୀକୃଷ୍ଣଙ୍କର ମାଖନ ଚୋରି, ଜରାସନ୍ଧ ଯୁଦ୍ଧ, ଜାମଳାର୍ଜୁନ ଦର୍ଶନ, ବଂଶୀବଟରେ ମହାସଭା, ସମ୍ଭରାଶୁର ସହ ଶ୍ରୀକୃଷ୍ଣଙ୍କ ଯୁଦ୍ଧ, ଓ ରାସ ଲୀଳା ଆଦି ପୌରାଣିକ କଥାବସ୍ତୁକୁ ନେଇ ସୁନ୍ଦର ପାର୍ଶ୍ୱମୂର୍ତ୍ତି ଦର୍ଶକଙ୍କ ମନ ମୋହୁଛି। ମଠ ପରିସରରେ ଥିବା ପୋଖରୀ ପାର୍ଶ୍ୱରେ ପଡିଥିବା ମେଳା, ଆକର୍ଷଣୀୟ ତୋରଣ ଓ ଆଲୋକ ସାଜସଜ୍ଜା ସମଗ୍ର ପରିସରକୁ ଉତ୍ସବମୁଖର କରିଛି। ମଙ୍ଗଳବାର ସନ୍ଧ୍ୟାରୁ ରାତିଯାଏ ଏଠି ଭକ୍ତଙ୍କ ପ୍ରବଳ ଭିଡ ପରିଲକ୍ଷିତ ହୋଇଛି।
