ଭୁବନେଶ୍ୱର, ୧୧ା୬ (ବ୍ୟୁରୋ)- ବର୍ତ୍ତମାନ ସାରା ଦେଶ ଅନ୍ଲକ୍-୧ରେ ଗତି କରୁଛି। କିନ୍ତୁ ଓଡ଼ିଶାରେ ଏବେ ବି ଲକ୍ଡାଉନ୍ ଜାରି ରହିଛି। ଅବଶ୍ୟ ରାଜ୍ୟ ସରକାର ଲକ୍ଡାଉନ୍-୫ରେ ନିୟମକୁ ସ୍ବଳ୍ପ ମାତ୍ରାରେ କୋହଳ କରିଛନ୍ତି। ଯାହାଫଳରେ ଏବେ ଜନସାଧାରଣ କରୋନା କଟକଣାକୁ ଖିଲାପ କରୁଥିବା ନଜରକୁ ଆସୁଛି। ବିଶେଷ କରି ବଜାର, ହାଟରେ ଗହଳିକୁ ଏଡ଼ାଇବା ଓ ଦୋକାନ ବଜାରରେ ସାମାଜିକ ଦୂରତ୍ୱ ନିୟମ ନ ମାନିବା ନଜରକୁ ଆସିଛି। ତେବେ ଏନେଇ ବୁଧବାର ଭୁବନେଶ୍ୱର ମହାନଗର ନିଗମ (ବିଏମ୍ସି) ଅତିରିକ୍ତ କମିସନର (୨) ଅବନି ପଟ୍ଟନାୟକ ଉତ୍ତର, ଦକ୍ଷିଣ-ପଶ୍ଚିମ, ଦକ୍ଷିଣ-ପୂର୍ବ ଜୋନାଲ ଡେପୁଟି କମିଶନରମାନଙ୍କୁ କାରଣ ଦର୍ଶାଓ ନୋଟିସ୍ ଦେବା ପରେ ଏବେ ଜୋନାଲ ଡେପୁଟି କମିଶନରଙ୍କ ନିଦ ଭାଙ୍ଗିଛି। ଗୁରୁବାର ଗୋଟିଏ ଦିନରେ ବିଏମ୍ସି, ବିଡିଏ ମିଳିତ ଟିମ୍ ପକ୍ଷରୁ ୩ ଜୋନ୍ରେ ୬ଟି ସ୍କ୍ବାର୍ଡ ୧୫ ଦୋକାନ ଓ ମଲ୍ ସିଲ୍ କରିଥିବା ଜଣାପଡ଼ିଛି। ବିଶେଷ କରି କୋଭିଡ୍-୧୯ ନିୟମ ନମାନିବା, ସାମଜିକ ଦୂରତ୍ୱ ନିୟମ ପାଳନ ନ କରିବା ଓ ମାସ୍କ ଏବଂ ସାନିଟାଇଜରର ବ୍ୟବହାରକୁ ନେଇ ସ୍କ୍ବାର୍ଡ ପକ୍ଷରୁ ଏହି ସିଲ୍ ପ୍ରକ୍ରିୟା କରାଯାଇଥିବା ସୂଚନା ମିଳିଛି।
