ଜୟପୁର, ୧୦।୬: ରାଜସ୍ଥାନର ହନୁମାନଗଡ ଜିଲାରେ ଜଣେ ଯୁବକ ଏକ ନିଆରା ଉଦାହରଣ ସୃଷ୍ଟି କରିଛନ୍ତି। ମୃତ ପିତାଙ୍କ ୧୮ ବର୍ଷ ପୁରୁଣା ୫୫ ଲକ୍ଷ ଟଙ୍କାର ଋଣ ଶୁଝିଛନ୍ତି ପୁଅ। ସୂଚନାଯୋଗ୍ୟ, ରାଓ୍ବତସର ନିବାସୀ ସନ୍ଦୀପଙ୍କ ପିତା ମିତାରାମ ୨୦୦୧ରେ ରାଓ୍ବତସରରେ ଏକ ଟ୍ରେଣ୍ଡିଂ କମ୍ପାନୀ ଖୋଲିଥିଲେ। ଏହି ସମୟରେ କିଛି ବ୍ୟବସାୟୀଙ୍କଠାରୁ ଋଣ ଆଣି କମ୍ପାନୀ ଗଢିଥିଲେ। କିନ୍ତୁ କ୍ଷତି ହେବାରୁ ବ୍ୟବସାୟୀଙ୍କ ଋଣ ଶୁଝି ନ ପାରି ନେପାଳ ପଳାଇଥିଲେ। ସେଠାରେ ଏକ ଦୋକାନ କରିଥିଲେ। ୫ ବର୍ଷ ସେଠାରେ ରହିବା ପରେ ତାଙ୍କର ମୃତ୍ୟୁ ହୋଇଥିଲା। ସେତେବେଳକୁ ସନ୍ଦୀପଙ୍କୁ ମାତ୍ର ୧୨ବର୍ଷ ହୋଇଥିଲା। ପିତାଙ୍କ ଋଣ ଶୁଝିବା ପାଇଁ ସେଦିନୁ ପଣ କରିଥିଲେ ସନ୍ଦୀପ। ଏଥିପାଇଁ ପରିଶ୍ରମ ଆରମ୍ଭ କରିଦେଇଥିଲେ। ଭଲ ଚାକିରି କରି ଟଙ୍କା ରୋଜଗାର କରିବା ପରେ ଜୁନ ୫ରେ ଅଚାନକ ଗାଁରେ ପହଞ୍ଚିଥିଲେ। ଯେଉଁ ବ୍ୟବସାୟୀଙ୍କଠାରୁ ତାଙ୍କ ପିତା ଋଣ ଆଣିଥିଲେ, ସେମାନଙ୍କୁ ଡକାଇ ୫୫ ଲକ୍ଷ ଟଙ୍କା ଶୁଝିଥିଲେ। ତାଙ୍କ ପ୍ରଶଂସାରେ ଶତମୁଖ ହୋଇ ଗାଁରେ ତାଙ୍କୁ ସମ୍ମାନୀତ କରାଯାଇଥିଲା।
