ନୂଆଦିଲ୍ଲୀ,୧।୬: ଭାରତରେ କରୋନା ମହାମାରୀ ସଂକ୍ରମଣ ଯୋଗୁ ସ୍ଥିତି ସଙ୍କଟ ଜନକ ହେବାରେ ଲାଗିଛି। ଦେଶରେ ଗତ ୧୮ ସପ୍ତାହ ମଧ୍ୟରେ ସଂକ୍ରମିତଙ୍କ ସଂଖ୍ୟା ଲକ୍ଷେ ୯୦ ହଜାର ୬୨୨ରେ ପହଞ୍ଚିଛି। ଏହା କରୋନା ଓ୍ବାଲର୍ଡ ମିଟର ଡାଟାବେସ୍ରୁ ଦର୍ଶାଯାଇଛିି। ସେହିପରି ମୃତକଙ୍କ ସଂଖ୍ୟା ୫ ହଜାର ୪୦୮ ଛୁଇଁଛି। ଅପରପକ୍ଷରେ ୯୧ ହଜାର ୮୫୫ ଜଣ ସଂକ୍ରମିତ ସୁସ୍ଥ ହୋଇ ଘରକୁ ଫେରିଛନ୍ତି। ଭାରତରେ ପ୍ରଥମ କରୋନା ସଂକ୍ରମିତଙ୍କୁ ଜାନୁୟାରୀ ୩୦ରେ ଚିହ୍ନଟ କରାଯାଇଥିଲା। ୩୧ ମେ ମଧ୍ୟରେ ସଂକ୍ରମିତଙ୍କ ସଂଖ୍ୟା ଲକ୍ଷେ ୯୦ ହଜାର ଟପିଛି। ପ୍ରତିଦିନ ନୂଆ ସଂକ୍ରମିତଙ୍କ ସଂଖ୍ୟା ଏବେ ୮ ହଜାରରୁ ଅଧିକ ହେବାରେ ଲାଗିଛି। ଏପରି ଜାରି ରହିଲେ ଆଉ ଗୋଟିଏ ଦିନ ପରେ ଦେଶରେ ସଂକ୍ରମିତଙ୍କ ସଂଖ୍ୟା ୨ ଲକ୍ଷ ଛୁଇଁବାର ଆଶଙ୍କା ରହିଛି। ତେବେ ଭାରତରେ କରୋନା ସଂକ୍ରମଣ ହାର ଆମେରିକା ଏବଂ ଅନ୍ୟ ବିକଶିତ ଦେଶ ତୁଳନାରେ ଯଥେଷ୍ଟ କମ୍ ରହିଛି। ୧୮ ସପ୍ତାହ ମଧ୍ୟରେ ଆମେରିକାରେ ସଂକ୍ରମିତ ସଂଖ୍ୟା ୧୪ ଲକ୍ଷ ୭୭ ହଜାର ଟପିଥିଲା। ଭାରତରେ ୧୦୧ ଦିନରେ ସଂକ୍ରମିତଙ୍କ ସଂଖ୍ୟା ୬୪ ହଜାର ଥିବାବେଳେ ଆମେରିକାରେ ଏହା ୬୭ ଏବଂ ଚାଇନା ଏହି ସଂଖ୍ୟା ୨୮ ଦିନରେ ଛୁଇଁଥିଲା। ସେହିପରି ଭାରତରେ ୧୧୪ ଦିନରେ ସଂକ୍ରମିତଙ୍କ ସଂଖ୍ୟା ଲକ୍ଷେ ୨୮ ହଜାର ଛୁଇଁଥିବାବେଳେ ଆମେରିକାରେ ୭୩ ଦିନରେ ଏହା ଘଟିଥିଲା। ଭାରତରେ ଲକ୍ଡାଉନ୍ ଯୋଗୁ ସ୍ଥିତି ନିୟନ୍ତ୍ରଣରେ ରହିଥିବା କୁହାଯାଉଛି।
