ନୂଆଦିଲ୍ଲୀ,୯-୧୧: ବିମୁଦ୍ରୀକରଣକୁ ଏହା ମଧ୍ୟରେ ୩ ବର୍ଷ ପୂରଣ ହୋଇଛି। ବଡ ବଡ ନୋଟଗୁଡିକୁ ଅଚଳ କରିବା ସହ ନୂଆ ନୋଟ ଆଣିଛନ୍ତି। ସରକାର ଆଣିଥିବା ୨୦୦୦ ଟଙ୍କିଆ ନୋଟଗୁଡିକ ଲୋକମାନେ ମହଜୁଦ କରି ରଖୁଥିବା ସରକାରଙ୍କ ପୂର୍ବତନ ଅର୍ଥ ସଚିବ ସୁଭାଷ ଚନ୍ଦ୍ର ଗର୍ଗ କହିଛନ୍ତି। ଏଣୁ ଏହି ନୋଟଗୁଡିକୁ ସରକାର ବନ୍ଦ କରି ଦେବା ଆବଶ୍ୟକ ବୋଲି ସେ କହିଛନ୍ତି। ଦେଶର ଆର୍ଥତ୍କ ବ୍ୟବସ୍ଥାରେ ଏବେ ନଗଦ ପରିମାଣ ପର୍ଯ୍ୟାପ୍ତ ହୋଇଛି। ଲୋକମାନେ ୨ ହଜାର ଟଙ୍କିଆ ନୋଟଗୁଡିକୁ ନିଜ ପାଖରେ ରଖି ନେଉଥିବା ଏହାର ପ୍ରମାଣ। ସାରା ଦୁନିଆ ଏବେ ଡିଜିଟାଲ ନେଣଦେଣ ଆଡକୁ ଯାଉଛି। ଭାରତ ଏହି ଦିଗରେ ବଢୁଥିଲେ ମଧ୍ୟ ଏହାର ହାର ଧୀମା ରହିଛି। ଦେଶର ପ୍ରଚଳିତ ମୋଟ ନୋଟର ମୂଲ୍ୟ ମଧ୍ୟରୁ ପ୍ରାୟ ଏକ ତୃତୀୟାଂଶ ୨୦୦୦ ଟଙ୍କିଆ ରହିଛି। ୨୦୦୦ ଟଙ୍କିଆର ଏକ ପ୍ରମୁଖ ଭାଗ ଏବେ ପ୍ରଚଳନରେ ନାହିଁ। ଏହାକୁ ଲୋକମାନେ ମହଜୁଦ କରି ରଖିଦେଉଛନ୍ତି। ଫଳରେ ନେଣଦେଣ ବେଳେ ୨୦୦୦ ଟଙ୍କିଆ ଦେଖାଯାଉ ନାହିଁ। ଏଣୁ ବିନା କୌଣସି ଅସୁବିଧାରେ ଏହି ନୋଟଗୁଡିକୁ ବନ୍ଦ କରାଯାଇ ପାରିବ। ଏହି ନୋଟଗୁଡିକୁ ବ୍ୟାଙ୍କଖାତାରେ ଜମା କରିବାକୁ କୁହାଗଲେ ଏହା ଭଲ ହେବ ବୋଲି ସେ ମତ ରଖିଛନ୍ତି। ଡିଜିଟାଲ ପେମେଣ୍ଟ ନଗଦର ସ୍ଥାନ ତ୍ୱରିତ ଭାବେ ନେଉଥିବା ବେଳେ ଏବେ ମଧ୍ୟ ଭାରତରରେ ୮୫% କାରବାର ନଗଦ ଭିତ୍ତିକ ବୋଲି ସେ କହିଛନ୍ତି।
