ନୂଆଦିଲ୍ଲୀ,୧୧-୧୨: ୨୦୦୦ ଟଙ୍କିଆ ନୋଟ ବଜାରରୁ ପ୍ରତ୍ୟାହାର ନେଇ ରହିଥିବା ଖବରକୁ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ମଙ୍ଗଳବାର ଖାରଜ କରିଦେଇଛନ୍ତି। ଏହାକୁ ନେଇ ଚିନ୍ତା କରିବାର କୌଣସି କାରଣ ନାହିଁ ବୋଲି ସେ କହିଛନ୍ତି। ସମାଜବାଦି ପାର୍ଟି ଏମ୍ପି ବିଶ୍ୱମ୍ବର ପ୍ରଶାଦ ନିଷାଦଙ୍କ ୨୦୦୦ ଟଙ୍କିଆ ବନ୍ଦ କରି ନୂଆ ୧୦୦୦ ଟଙ୍କିଆ ଆଣିବା ନେଇ ଏକ ପ୍ରଶ୍ନ କରିଥିଲେ। ରାଜ୍ୟ ସଭାରେ ତାର ଉତ୍ତର ରଖି ଅର୍ଥରାଷ୍ଟ୍ରମନ୍ତ୍ରୀ ଠାକୁର କହିଛନ୍ତି ଯେ, ସରକାର ବିମୁଦ୍ରୀକରଣ ଦ୍ୱାରା କଳା ଟଙ୍କାକୁ ହଟାଇବା ଦିଗରେ ପଦକ୍ଷେପ ନେଇଥିଲେ। ଏହା ବାଦ ନକଲି ନୋଟ କାରବାର ଏବଂ ଟେରର ଫଣ୍ଡିଂର ହ୍ରାସ ଏବଂ ଡିଜିଟାଲ କାରବାର ବୃଦ୍ଧି ଭଳି ପ୍ରସଙ୍ଗକୁ ବିଚାର କରାଯାଇଥିଲା। ସଂସଦକୁ ଦିଆଯାଇଥିବା ତଥ୍ୟ ମୁତାବକ ୨୦୧୬ ନଭେମ୍ବର ୪ରେ ସାରା ଦେଶରେ ୧୭.୭୪ ଲକ୍ଷ କୋଟି ଟଙ୍କା ପ୍ରଚଳନରେ ଥିଲା। ଚଳିତ ବର୍ଷ ଡିସେମ୍ବର ୨ ସୁଦ୍ଧା ଏହା ୨୨.୩୫ ଲକ୍ଷ କୋଟି ଟପିଛି।
