ଓ୍ବାଶିଂଟନ,୧୯।୧୨(ଏପି): ବେଜିଂରେ ୨୦୨୨ ଶୀତକାଳୀନ ଅଲିମ୍ପିକ୍ସ ଆୟୋଜନ ହେବାକୁ ଯାଉଛି। ତେବେ ଏହି ମେଗା ଇଭେଣ୍ଟର ପ୍ରସ୍ତୁତି ପାଇଁ ବ୍ୟାପକ ଭାବେ ମାନବିକ ଅଧିକାରର ଉଲ୍ଲଂଘନ ହେଉଛି ଓ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓଏ) ବିରୋଧରେ ଅଭିଯୋଗ ଆସିଛି। ଚାଇନାରେ ପାରମ୍ପରିକ ଭାବେ ରହୁଥିବା କେତେକ ସଂଖ୍ୟାଲଘୁ ସମ୍ପ୍ରଦାୟ ସଙ୍ଗଠନ ଏ ନେଇ ଆଇଓଏକୁ ଦାୟୀ କରିଛି।
ଚାଇନାରେ ରହୁଥିବା ତିବ୍ବତ, ହଂକଂର ନାଗରିକ ଓ ଉଇଘର ମିଳିତ ଭାବେ ଏ ନେଇ ଆଇଓସି ଅଧ୍ୟକ୍ଷ ଥୋମାସ ବାକ ଓ ଆଇଓସି ସଦସ୍ୟ ଜୁଆନ ଆଣ୍ଟୋନିଓ ସାମରାଞ୍ଚ୍ ଜୁନିୟରଙ୍କୁ ଚିଠି ଲେଖିଛନ୍ତି। ଆଇଓସିର ଏହି ଅଧିକାରୀମାନେ ପ୍ରସ୍ତୁତି କାର୍ଯ୍ୟ ତଦାରଖ କରୁଛନ୍ତି। ମାନବିକ ଅଧିକାର ବ୍ୟାପକ ଭାବେ ଉଲ୍ଲଂଘନ ହେଉଥିଲେ ମଧ୍ୟ ଆଇଓସି ଏହାକୁ ଜାଣିଶୁଣି ଅଣଦେଖା କରୁଛି ଓ ଅନ୍ଧ ପାଲଟି ଯାଇଛି ବୋଲି ଏମାନେ ଅଭିଯୋଗ କରିଛନ୍ତି। ଦୁଇମାସ ତଳେ ଏହି ସମ୍ପ୍ରଦାୟର ପ୍ରତିନିଧିମାନେ ଆଇଓସି ଅଧିକାରୀଙ୍କୁ ଦେଖା କରି ଏ ବିଷୟରେ ଆଲୋଚନା କରିଥିଲେ। ଏପରିକି ଅଲିମ୍ପିକ୍ସକୁ ବେଜିଂରୁ ସ୍ଥାନାନ୍ତର କରିବା ପାଇଁ ଚିଠି ଲେଖାଯାଇଥିଲା। ଅନ୍ୟପଟେ କେବଳ କ୍ରୀଡ଼ା ଇଭେଣ୍ଟ ପାଇଁ ଉତ୍ତରଦାୟୀ ରହିବୁ। କିନ୍ତୁ ଆୟୋଜକ ଦେଶର ରାଜନୀତି କିମ୍ବା ଘରୋଇ ନୀତି ନେଇ ଆମର କିଛି କରିବାର ନାହିଁ ବୋଲି ଆଇଓସି ସ୍ପଷ୍ଟ କରିଛି।
