ପାରାଦୀପ,୨୩।୧(ସ୍ବ.ପ୍ର.): ମାତ୍ର ୩୦ ଟଙ୍କା ବିନିମୟରେ ମିଳୁଛି କୋଭିଡ୍ ରିପୋର୍ଟ। ପାରାଦୀପ ଅଭଚାନ୍ଦପୁର ଥାନାଠାରୁ ମାତ୍ର ୨୦୦ ମିଟର ଦୂରରେ ଥିବା ଏକ ଜେରକ୍ସ ଦୋକାନରୁ ଏହି ରିପୋର୍ଟ ଦିଆଯାଉଥିଲା। ପାରାଦୀପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଶୁକ୍ରବାର ଏନେଇ ଖୋଳତାଡ କରାଯାଇଛି। ଖବରପାଇ ପୋଲିସ ସେଠାରେ ପହଞ୍ଚତ୍ ଦୋକାନରୁ ୩ ଜଣଙ୍କୁ ଉଠାଇ ଆଣି ପଚରାଉଚୁରା କରୁଛି।
ମିଳିଥିବା ସୂଚନା ଅନୁଯାୟୀ, ପାରାଦୀପ ତୈଳ ବିଶୋଧନାଗାର ପ୍ରକଳ୍ପରେ କାର୍ଯ୍ୟରତ ଶ୍ରମିକ ଓ କର୍ମଚାରୀଙ୍କ ପ୍ରବେଶ ପାଇଁ କୋଭିଡ୍ ନେଗେଟିଭ ରିପୋର୍ଟ ଅପରିହାର୍ଯ୍ୟ କରାଯାଇଛି। ମେଡିକାଲ ଯାଇ କୋଭିଡ୍ ଟେଷ୍ଟ ରିପୋର୍ଟ ଆଣିବା ସମୟସାପେକ୍ଷ ହେଉଥିଲା। ଏହାର ସୁଯୋଗ ନେଇ ଅଭିଯୁକ୍ତ ଜେରକ୍ସ ଦୋକାନୀ ଶ୍ରମିକମାନଙ୍କୁ ନକଲି କୋଭିଡ୍ ରିପୋର୍ଟ ପ୍ରଦାନ କରୁଥିଲେ। ଏଥିରେ ପାରାଦୀପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଜଣେ ଡାକ୍ତରଙ୍କ ନାମ ଓ ଷ୍ଟାମ୍ପ ବ୍ୟବହାର କରୁଥିଲେ। ଗତବର୍ଷ ଜୁନ୍ରୁ ନଭେମ୍ବର ପର୍ଯ୍ୟନ୍ତ ଏହି ନକଲି ରିପୋର୍ଟ ପାଇଁ ୨୦୦ ରୁ ୩୦୦ ଟଙ୍କା ନିଆଯାଉଥିଲା ବୋଲି ପୋଲିସ ତଦନ୍ତରୁ ଜଣାପଡ଼ିଛି।
ପାରାଦୀପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଜଣେ ଡାକ୍ତର ଏ ସମ୍ପର୍କରେ ସୂଚନାପାଇ ଅଭୟଚାନ୍ଦପୁର ପୋଲିସକୁ ଜଣାଇଥିଲେ। ପରେ ଏଏସ୍ପି ନିମାଇଁ ସେଠୀ ଓ ଥାନା ଅଧିକାରୀ ଯୁଗଳ କିଶୋର ଦାସ ସେଠାରେ ପହଞ୍ଚତ୍ ଘଟଣାର ତଦନ୍ତ କରିଛନ୍ତି। ରିପୋର୍ଟ ଲେଖାହେବା ବେଳକୁ ଥାନାରେ କୌଣସି ମାମଲା ରୁଜୁ ହୋଇ ନ ଥିଲା। ଏସମ୍ପର୍କରେ ଥାନା ଅଧିକାରୀ ଦାସ କହିଛନ୍ତି, କାଗଜପତ୍ର ଯାଞ୍ଚ ଚାଲିଛି। ସବିଶେଷ ତଥ୍ୟ ଶନିବାର ପ୍ରକାଶ କରାଯିବ।
