ଜୋନପୁର,୪।୧୧: ବେଳେବେଳେ ଥଟ୍ଟାରେ ଲାଗିଥିବା ସର୍ତ୍ତ ମୃତ୍ୟୁର କାରଣ ହୋଇଥାଏ। ଅଣ୍ଡା ଓ ମଦରେ ସର୍ତ୍ତ ଲଗାଇ ଜଣେ ବ୍ୟକ୍ତି ମୃତ୍ୟୁମୁଖକୁ ଠେଲି ହୋଇଯାଇଥିବା ଜଣାପଡ଼ିଛି। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ଉତ୍ତରପ୍ରଦେଶର ଜୋନପୁରରେ। ସୂଚନାଯୋଗ୍ୟ, ଶାହଗଞ୍ଜ କୋତଓ୍ବାଲି ଅଞ୍ଚଳର ଅର୍ଗପୁର ଗଁାର ସୁଭାଷ ଯାଦବ(୪୨) ଶନିବାର ବିବିଗଞ୍ଜ ବଜାରରେ ଜଣେ ବନ୍ଧୁଙ୍କ ସହ ସର୍ତ୍ତ ଲଗାଇଥିଲେ। ୧ ବୋତଲ ମଦ ଓ ୫୦ଟି ଅଣ୍ଡା ଯିଏ ଖାଇ ସର୍ତ୍ତ ଜିତିବ ତାକୁ ୨ହଜାର ଟଙ୍କା ଦିଆଯିବ। ତେବେ ସୁଭାଷ ଏହି ସର୍ତ୍ତକୁ ମାନି ନେବା ସହ ୪୧ ଟି ଅଣ୍ଡା ସମ୍ପୂର୍ଣ୍ଣ ଖାଇ ଦେଇଥିଲେ। ଯେତେବେଳେ ୪୨ଟି ଅଣ୍ଡା ଖାଇବାକୁ ଆରମ୍ଭ କଲେ ସେହି ସମୟରେ ସେ ଅଚେତ ହୋଇପଡ଼ିଥିଲେ। ସେଠାରେ ଉପସ୍ଥିତ ଥିବା ଲୋକେ ତାଙ୍କୁ ସଙ୍ଗେ ସଙ୍ଗେ ସ୍ଥାନୀୟ ହସ୍ପିଟାଲକୁ ନେଇଥିଲେ। ହେଲେ ଅବସ୍ଥା ଗୁରୁତର ହେବାରୁ ତାଙ୍କୁ ଲକ୍ଷ୍ନୌ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଚିକିତ୍ସାଧିନ ଅବସ୍ଥାରେ ସୋମବାର ତାଙ୍କର ମୃତ୍ୟୁ ହୋଇଛି। ପୋଲିସ ଘଟଣାସ୍ଥଳରେ ପହଞ୍ଚି ମାମଲା ରୁଜୁ କରି ତଦନ୍ତ ଚଳାଇଛି।
