ପାଟଣା,୧୫।୫(ସ୍ବ.ପ୍ର.): କେନ୍ଦୁଝର ଜିଲା ପାଟଣା ତହସିଲ ଟାଙ୍ଗରପଡା ରାଜସ୍ବ ନିରୀକ୍ଷକ ଅନ୍ତର୍ଗତ ଅଙ୍କୁରା ରାଜସ୍ବ ମୌଜାରେ ଅକ୍ସନ ହୋଇଥିବା ୧୦ ଏକର ୭୨ ଡିସିମିଲ ହୁଡିରୁ ପଥର ଉତ୍ତୋଳନକୁ ଶୁକ୍ରବାର ଶତାଧିକ ମହିଳା ବିରୋଧ କରିଛନ୍ତି। ପାଟଣା ତହସିଲ ପକ୍ଷରୁ ସମ୍ପୃକ୍ତ ହୁଡ଼ିର ଚିହ୍ନଟ ସମୟରେ ଗ୍ରାମବାସୀ ଏହାକୁ ବିରୋଧ କରି ପ୍ରତିବାଦ କରିଥିବା ଜଣାପଡ଼ିଛି।
ସୂଚନାନୁଯାୟୀ, ଉକ୍ତ ହୁଡ଼ିଟି ଚଳିତ ବର୍ଷ ପ୍ରଥମ କରି ସରକାରଙ୍କ ଦାରା ସ୍ଥାୟୀ ପଥର ଉତ୍ସ ଭାବେ ଘୋଷଣା ହେବା ପରେ ୩୧୧ ଟଙ୍କା କ୍ୟୁବିକ ମିଟରରେ କଟକର ଏକ କନଷ୍ଟ୍ରକ୍ସନ ପ୍ରାଇଭେଟ ଲିମିଟେଡ଼ କମ୍ପାନୀ ୫ ବର୍ଷିଆ ଲିଜ୍ ସହ ମାଇନିଂ ଆପ୍ରୁଭାଲ ଓ ଇସି ପାଇସାରିଛି। ଯଦି ଏହି ହୁଡିରୁ ପଥର ଉତ୍ତୋଳନ ବନ୍ଦ ହେବ ସରକାର ବାର୍ଷିକ ୯୦ ଲକ୍ଷ ଟଙ୍କାର ରାଜସ୍ବ ହରାଇବେ ବୋଲି ତହସିଲଦାର ଶିବପ୍ରଶାଦ ମୁର୍ମୁ କହିଛନ୍ତି। ସମ୍ପୃକ୍ତ କମ୍ପାନୀ ସରକାରଙ୍କ ରାଜସ୍ବ ବିଭାଗକୁ ଏକଚତୁର୍ଥାଂଶ ଅର୍ଥାତ ୨୨ ଲକ୍ଷ ଟଙ୍କା ପୈଠ କରିସାରିଛି। ତେବେ ବିରୋଧ ପରେ ଘଟଣାସ୍ଥଳରେ ତହସିଲଦାର ଶିବପ୍ରସାଦ ମୁର୍ମୁ, ଟାଙ୍ଗରପଡା ରାଜସ୍ବ ନିରୀକ୍ଷକ ଲିଙ୍ଗରାଜ ଦାଶ ଓ ପାଟଣା ପୋଲିସ ପହଞ୍ଚଥିଲେ ହେଁ କୌଣସି ମତେ ଉକ୍ତ ହୁଡିରୁ ପଥର ଉତ୍ତୋଳନ କରିବାକୁ ଦିଆଯିବନାହିଁ ବୋଲି ଗ୍ରାମବାସୀ ଅଡି ବସିଛନ୍ତି।