ପୁରୀ ଅଫିସ, ୨୯ା୬: ଘୋଷ ଯାତ୍ର।କୁ ଆଉ ୫ ଦିନ। ଚଳଚଞ୍ଚଳ ଶ୍ରୀକ୍ଷେତ୍ର। ଜିଲା ପ୍ରଶାସନ ପକ୍ଷରୁ ଚାଲିଛି ପ୍ରସ୍ତୁତି। ସଜେଇ ହେଲାଣି ଶ୍ରୀକ୍ଷେତ୍ର। ବଡଦାଣ୍ଡରେ ଭକ୍ତ ଓ ପର୍ଯ୍ୟଟକଙ୍କ ଭିଡ଼। ସମସ୍ତ ହୋଟେଲ, ଲଜ୍ ମଠ ମାନଙ୍କରେ ଜମିଲାଣି ଭକ୍ତଙ୍କ ଭିଡ଼। ଅନ୍ୟପଟେ ପର୍ଯ୍ୟଟକଙ୍କ ଭିଡ଼କୁ ଦୃଷ୍ଟିରେ ରଖି କେତେକ ଅସାଧୁ ବ୍ୟବସାୟୀ ନିମ୍ନମାନର ଖାଦ୍ୟ ସାମ୍ରଗୀ ବିକ୍ରି କରି ପର୍ଯ୍ୟଟକଙ୍କୁ ଶୋଷଣ କରିବା ଆରମ୍ଭ କରିଛନ୍ତି। ଫୁଟଫାତ୍ ଠାରୁ ହୋଟେଲ ସବୁଠି ଚାଲିଛି ପର୍ଯ୍ୟଟକଙ୍କୁ ଶୋଷଣ। ଏ ସମ୍ପର୍କରେ ଜାଣି ମଧ୍ୟ ପ୍ରଶାସନ ନୀରବ ରହିଛି। ଅନ୍ୟପଟେ ସହରରେ ଛତୁ ଫୁଟିବା ଖୋଲିଥିବା ଉଠା ଦୋକାନ, ଫାଷ୍ଟଫୁଡ ସେଣ୍ଟର ତଥା କେତେକ ହୋଟେଲରେ ବାସି ଖାଦ୍ୟ ବିକ୍ରି ହେଉଛି। ଏନେଇ ଜିଲା ପ୍ରଶାସନ ପକ୍ଷରୁ କୌଣସି କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ବର୍ତ୍ତମାନ ସୁଦ୍ଧା ଏନେଇ ପୌର ପ୍ରଶାସନ ପକ୍ଷରୁ କୌଣସି ସ୍ଥାନରେ ଚଢ଼ାଉ କରାଯାଇନାହିଁ। ବିଗତ ବର୍ଷ ଅଖାଦ୍ୟ ଖାଇ ୫୦ରୁ ଊର୍ଦ୍ଧ୍ୱ ପର୍ଯ୍ୟଟକ, ଭକ୍ତ ଅସୁସ୍ଥ ହୋଇଥିଲେ। ଚଳିତ ବର୍ଷ ମଧ୍ୟ ଏହାର ପୁନରାବୃତ୍ତି ନ ଘଟିବ କିଏ କହିବ। ଅଥଚ ବର୍ତ୍ତମାନ ସୁଦ୍ଧା ପୌର ପ୍ରଶାସନ ପକ୍ଷରୁ କୌଣସି ଖାଦ୍ୟଷ୍ଟଲରେ ଚଢ଼ାଉ କରାଯାଇନାହିଁ। ପ୍ରକାଶ ଯେ, ବଡଦାଣ୍ଡର ଦୁଇ ପାର୍ଶ୍ୱ ରାସ୍ତାକଡରେ ବର୍ଷ ତମାମ ଫୁଟଫାତ୍ ଦୋକାନ, ଫାଷ୍ଟଫୁଡ ଦୋକାନରେ ନିମ୍ନମାନର ଖାଦ୍ୟ ବିକ୍ରି ହେଉଥିଲେ ବି, ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥାଏ। କେବଳ ରଥଯାତ୍ରା ଆସିଲେ, ପୌର ପ୍ରଶାସନ ପକ୍ଷରୁ ପକ୍ଷରୁ ଲୋକ ଦେଖାଣିଆ ଭାବେ ବିଭିନ୍ନ ହୋଟେଲ, ଫୁଟଫାତ୍ ଦୋକାନରେ ମାନଙ୍କରେ ଚଢାଉ କରାଯାଏ। ସାମାଜିକ କର୍ମୀ ପ୍ରସନ୍ନ କୁମାର ଦାଶ କୁହନ୍ତି, ସହରର ବିଭିନ୍ନ ଗଳିକନ୍ଦିରେ ନିମ୍ନମାନର ଖାଦ୍ୟ ବିକ୍ରି ହେଉଛି। ବିଶେଷ କରି ଗୁଣ୍ଡିଚାମନ୍ଦିର ଠାରୁ ମରିଚିକୋଟ ଛକ, ବେଳାଭୂମି ନିକଟରେ ଶହ ଶହ ଉଠା ଦୋକାନ ରହିଛି। ଦୈନିକ ନିମ୍ନମାନର ପଚାସଢ଼ା ଖାଦ୍ୟ ପର୍ଯ୍ୟଟକ ମାନଙ୍କୁ ବିକ୍ରି କରାଯାଉଛି। ଏହା ଜାଣି ମଧ୍ୟ ପ୍ରଶାସନ ଚୁପ୍ ବସିଛି। ଯୁବନେତା ଆଶୁତୋଷ ମିଶ୍ର କୁହନ୍ତି, ବର୍ଷସାରା ବଡଦାଣ୍ଡର ରାସ୍ତାର ଦୁଇ ପାର୍ଶ୍ୱରେ ୫ଶହରୁ ଊର୍ଦ୍ଧ୍ୱ ଚାଉମିନ, ଫାଷ୍ଟଫୁଡ ସେଣ୍ଟର ମାନଙ୍କରେ ନିମ୍ନ ଖାଦ୍ୟ ବିକ୍ରି କରୁଥିବା ନେଇ ପୂର୍ବରୁ ବହୁବାର ଅଭିଯୋଗ ମଧ୍ୟ ହେଉଛି। ତେବେ ଏନେଇ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ରଥଯାତ୍ରାକୁ ଦୃଷ୍ଟିରେ ରଖି ପୌର ପ୍ରଶାସନ ତୁରନ୍ତ ଏଦିଗରେ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ମହଲରେ ଦାବି ହୋଇଛି। ଏନେଇ ଜିଲାପାଳ ବଲୱନ୍ତ ସିଂ କୁହନ୍ତି, ଖାଦ୍ୟଷ୍ଟଲ ଯାଞ୍ଚ ଲାଗି ନିର୍ଦ୍ଦେଶ ଦିଆଯାଇଛି। ୬ ଜଣ ଫୁଡ ଇନିସ୍ପେକ୍ଟର ଦାୟିତ୍ୱରେ ନିୟୋଜିତ ହେବେ।