ଭଦ୍ରକ ଅଫିସ,୨୬ା୪ : ଲକ୍ଡାଉନ୍ ସମୟରେ କୃଷିକ୍ଷେତ୍ର ଯେମିତି ପ୍ରଭାବିତ ନ ହେବ ସେଥିପାଇଁ କେନ୍ଦ୍ର ଓ ରାଜ୍ୟ ସରକାର ଗୁରୁତ୍ୱାରୋପ କରିଛନ୍ତି । ହେଲେ ଭଦ୍ରକ ଜିଲାର କୃଷି ବିଭାଗକୁ ଅଖିମୁଠି ଅନୁକୂଳ ଲାଗି ଏଯାବତ ଗୋଟିଏ ବସ୍ତା ବି ସରକାରୀ ଧାନବିହନ ଆସିନାହିଁ । ଆଜି ଅଖିମୁଠି କେମିତି ଅନୁକୂଳ କରିବେ ସେ ନେଇ ଚାଷୀମାନେ ଶଙ୍କା ବ୍ୟକ୍ତ କରିଛନ୍ତି । ଭଦ୍ରକ ଜିଲା କୃଷି ବିଭାଗ ଅଧିକାରୀ କିିରଣ କୁମାର ପରି ତଥ୍ୟ ମୁତାବକ, ଜିଲାରେ ଏବର୍ଷ ୧ ଲକ୍ଷ ୨୪ ହଜାର ହେକ୍ଟର ଜମିରେ ଖରିଫ ଧାନଚାଷ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଛି । ଚାଷୀମାନଙ୍କ ପାଇଁ ପ୍ରତିବର୍ଷ ୫ ହଜାରରୁ ୮ ହଜାର କ୍ୱିଣ୍ଟାଲ ପର୍ଯ୍ୟନ୍ତ ବିହନ ଆବଶ୍ୟକ ପଡୁଥିବା ବେଳେ ରାଜ୍ୟ ବିହନ ନିଗମ ମାର୍ଚ୍ଚ ସୁଦ୍ଧା ଏହାକୁ ଯୋଗାଇ ଦେଇଥାନ୍ତି । ମାତ୍ର କରୋନା କଟକଣା ଯୋଗୁ ଗାଡ଼ି ଚଳାଚଳ ବନ୍ଦ ରହିବାରୁ ବିହନ ଆସିପାରିନାହିଁ । ଚଳିତବର୍ଷ ଜିଲା କୃଷି ବିଭାଗ ମାଧ୍ୟମରେ ଚାଷୀଙ୍କୁ ୭ ହଜାର କ୍ୱିଣ୍ଟାଲ ଧାନବିହନ ଯୋଗାଇ ଦେବାକୁ ଲକ୍ଷ୍ୟ ରଖାଯାଇଛି । ସେପଟେ ଚାଷୀ ନିଜସ୍ବ ଉଦ୍ୟମରେ ସାଇତି ରଖିଥିବା ବିହନ ଓ କିଣା ସରକାରୀ ବିହନକୁ ନେଇ ଧାନବୁଣା ତଥା ତଳିପକା କାମ ଆରମ୍ଭ କରିବେ । ମାତ୍ର ଏବେ ସୁଦ୍ଧା ଜିଲାକୁ ସରକାରୀ ବିହନ ତ ଆସିନାହିଁ, ବିହନ କିସମ ଅନୁସାରେ କାମ କଣ ରହିବ ତାହା ମଧ୍ୟ ରାଜ୍ୟ କୃଷି ବିଭାଗ ଏ ପର୍ଯ୍ୟନ୍ତ ଅବଗତ କରିନାହିଁ । ତେବେ ଏପ୍ରିଲ ଶେଷସୁଦ୍ଧା ଜିଲା କୃଷି ବିଭାଗକୁ ବିହନ ଆସିଯିବାର ସମ୍ଭାବନା ରହିଥିବା ଜିଲା କୃଷି ଅଧିକାରୀ ପ୍ରକାଶ କରିଛନ୍ତି । ଜିଲାର ୮୦ ପ୍ରତିଶତ ଲୋକ ଧାନଚାଷ ଉପରେ ନିର୍ଭରଶୀଳ । ଅଖିମୁଠି ପରେ ଧାନବୁଣା, ତଳିପକା ଆଦି ଚାଷକାମ ଜୋର୍ ଧରିଥାଏ । ଜିଲାରେ କରୋନା ଆତଙ୍କ ଖେଳାଇ ଦେଇଥିବାରୁ ଲୋକେ ପଦାକୁ ବାହାରୁନାହାନ୍ତି । ଯେଉଁଥିପାଇଁ ଭଦ୍ରକ ଜିଲାର ଚାଷୀମାନ ପ୍ରଭାବିତ ହୋଇଛନ୍ତି । ଏବେ ୩ ଦିନ ହେଲା ସରକାର କୃଷି କାର୍ଯ୍ୟକୁ କଟକଣାମୁକ୍ତ କରିଛନ୍ତି।