ଭୁବନେଶ୍ୱର,୨୬।୫(ବ୍ୟୁରୋ): କରୋନା ସଂକ୍ରମଣ ରୋକିବାକୁ ନଗର ଉନ୍ନୟନ ବିଭାଗ ନୂତନ ପଦକ୍ଷେପ ଗ୍ରହଣ କରିଛି। ଏହି କ୍ରମରେ ସହରାଞ୍ଚଳରେ ଥିବା ଗୋଷ୍ଠୀ ପାଇଖାନା/ଶୌଚାଳୟକୁ ରାଜ୍ୟ ସରକାର ଶୁଳ୍ପମୁକ୍ତ କରିଛନ୍ତି । ଆଗାମୀ ଅଗଷ୍ଟ ୩୧ ଯାଏ ମାଗଣା ସେବା ଦେବାକୁ ନଗର ଉନ୍ନୟନ ସଚିବ କଟକ, ଭୁବନେଶ୍ୱର ସମେତ ସମସ୍ତ ପୌରାଞ୍ଚଳ କର୍ତ୍ତୃପକ୍ଷଙ୍କୁ ଚିଠି ଲେଖିଛନ୍ତି। ଆଦାୟ ହେଉଥିବା ଖୁଚୁରା ଯୋଗୁ ରୋଗ ବ୍ୟାପିବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ସମସ୍ତ ଶୌଚାଳୟଗୁଡ଼ିକୁ ଶୁଳ୍କମୁକ୍ତ କରାଯାଇଛି। ଏଣୁ କୌଣସି ଶୌଚାଳୟ ବ୍ୟବହାରକାରୀଙ୍କଠାରୁ ପଇସା ରଖାଯିବ ନାହିଁ। ଏନେଇ ଚିଠିରେ ନିର୍ଦ୍ଦେଶ ଦିଆଯାଇଛି। ଏପରିକି ସୁଲଭ ଇଣ୍ଟରନ୍ୟାଶନାଲ ଦ୍ୱାରା ପରିଚାଳିତ ଶୌଚାଳୟକୁ ମଧ୍ୟ ମାଗଣାରେ ବ୍ୟବହାର କରିହେବ। ଶୌଚାଳୟ ସଫାସୁତୁରା ଖର୍ଚ୍ଚ ସ୍ଥାନୀୟ ପୌର ସଂସ୍ଥା ବହନ କରିବାକୁ ଚିଠିରେ ନିର୍ଦ୍ଦେଶ ଦିଆଯାଇଥିବା ସୂଚନା ମିଳିଛି।