ଭୁବନେଶ୍ୱର,୧୬।୩(ବ୍ୟୁରୋ): ରାଜଧାନୀ ଭୁବନେଶ୍ୱର ସମେତ ଅନୁଗୋଳ, ବାଲେଶ୍ୱର, କୋରାପୁଟ ଏବଂ ଶିଳ୍ପନଗରୀ ରାଉରକେଲାରେ ନୂତନ ଅଗ୍ନିଶମ ସେବା ରେଞ୍ଜ୍ କାର୍ଯ୍ୟାଳୟ ଖୋଲାଯିବ। ଏଥିପାଇଁ ୨୦୨୦-୨୧ ଆର୍ଥିକ ବର୍ଷ ପାଇଁ ଗୃହ ବିଭାଗ ବଜେଟରୁ ଆବଶ୍ୟକ ଅର୍ଥ ଯୋଗାଇ ଦିଆଯାଉ ବୋଲି ବିଭାଗୀୟ ଷ୍ଟାଣ୍ଡିଂ କମିଟି ପକ୍ଷରୁ ସୁପାରିସ କରାଯାଇଛି। ଦୈନନ୍ଦିନ ଜୀବନରେ ତୃଣମୂଳରେ ସେବା ଯୋଗାଉଥିବା ହୋମ୍ଗାର୍ଡ(ଗୃହରକ୍ଷୀ)ଙ୍କ ଦୈନିକ ପାରିଶ୍ରମିକ ୩୦୦ରୁ ୫୦୦ ଟଙ୍କାକୁ ବୃଦ୍ଧି କରିବା ପାଇଁ ମଧ୍ୟ ସୁପାରିସ କରାଯାଇଛି। ନିକଟରେ ଏ ସମ୍ପର୍କିତ ଏକ ମାମଲାର ଶୁଣାଣି କରି ଓଡ଼ିଶା ହାଇକୋର୍ଟ ସମାନ ନିର୍ଦ୍ଦେଶ ଦେଇଥିଲେ। ଚଳିତ ବର୍ଷ ଜାନୁୟାରୀ ପହିଲାରୁ ଏହା ଲାଗୁ କରିବାକୁ ନ୍ୟାୟାଳୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟଙ୍କ ରାୟ ଏବଂ ଷ୍ଟାଣ୍ଡିଂ କମିଟିର ସୁପାରିସ କାର୍ଯ୍ୟକାରୀ ହେଲେ ରାଜ୍ୟରେ କର୍ତ୍ତବ୍ୟରତ ୧୭,୭୫୭ ହୋମ୍ଗାର୍ଡ ଉପକୃତ ହେବେ।
ବ୍ରଜରାଜନଗର ବିଧାୟକ କିଶୋର ମହାନ୍ତିଙ୍କ ଅଧ୍ୟକ୍ଷତାରେ ଗଠିତ ଷ୍ଟାଣ୍ଡିଂ କମିଟି ପକ୍ଷରୁ ଖାଲିଥିବା ହୋମ୍ଗାର୍ଡ ପଦବୀ ପୂରଣ ନେଇ ଗୁରୁତ୍ୱ ଦିଆଯାଇଛି। ସେହିଭଳି ରାଜ୍ୟର ପ୍ରମୁଖ ଜେଲଗୁଡ଼ିକରେ ଆମ୍ବୁଲାନ୍ସ ବ୍ୟବସ୍ଥା ସୁନିଶ୍ଚିତ କରିବା ପାଇଁ ବଜେଟରେ ବ୍ୟବସ୍ଥା କରିବାକୁ କୁହାଯାଇଛି। ଜେଲରେ ଖାଲିଥିବା ଡାକ୍ତର ପଦବୀ ପୂରଣ ସହ ‘ଅଦର କଣ୍ଟିଜେନ୍ସିଂ’ ଅଧୀନରେ ୫୮୭ ଥାନା ପାଇଁ ଆବଶ୍ୟକ ଅର୍ଥ ପ୍ରଦାନ ଲାଗି କମିଟି ମତ ରଖିଛି। ଜାତୀୟ ସର୍ତ୍ତାବଳୀ ଅନୁଯାୟୀ, ରାଜ୍ୟର ପ୍ରତ୍ୟେକ ଥାନାର ମାନବ ସମ୍ବଳ ବୃଦ୍ଧି କରାଯାଉ। ପ୍ରତ୍ୟେକ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର(ସିଏଚ୍ସି)ରେ ଗୋଟିଏ ଲେଖାଏ ଶବ ବ୍ୟବଚ୍ଛେଦ ୟୁନିଟ୍ ଖୋଲାଯାଉ। ଫରେନ୍ସିକ୍ ଲାବରେଟୋରିଗୁଡ଼ିକରେ ସାଇଣ୍ଟିଫିକ୍ ଆସିଣ୍ଟାଣ୍ଟ ପଦବୀ ଦ୍ୱିଗୁଣ କରିବା ପାଇଁ ପଦକ୍ଷେପ ନିଆଯିବା ସହ ପୋଲିସ ସେବାରେ ହେଉଥିବା ବିଭିନ୍ନ ନିଯୁକ୍ତିକୁ ୩ ପର୍ଯ୍ୟାୟ ମଧ୍ୟରେ ସାରିବା ପାଇଁ କମିଟି ପକ୍ଷରୁ ସୁପାରିସ କରାଯାଇଛି। ରାଜ୍ୟରେ ଅଗ୍ନିଶମ ନିରାପତ୍ତା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଏକାଧିକ ଗୁରୁତ୍ୱପୂର୍ଣ୍ଣ ସୁପାରିସ ପ୍ରଦାନ କରାଯାଇଛି। ପୂର୍ତ୍ତ ବିଭାଗ ଦାୟିତ୍ୱରେ ଥିବା ଅଗ୍ନିଶମ ଅଧିକାରୀମାନଙ୍କ ଆବାସିକ କୋଠାର ରକ୍ଷଣାବେକ୍ଷଣ ପାଇଁ ଆଗାମୀ ଆର୍ଥିକ ବର୍ଷରେ ଅତିରିକ୍ତ ୧୦ କୋଟି ଟଙ୍କା ପ୍ରଦାନ ଲାଗି ମଧ୍ୟ କୁହାଯାଇଛି। ବିଶେଷକରି ସବୁ ବର୍ଗର ପୋଲିସ ଅଧିକାରୀ ରହିବା ପାଇଁ ନିର୍ମିତ କୋଠାବାଡ଼ିର ଗୁଣାତ୍ମକମାନ ସୁଦୃଢ଼ କରିବା ନିମନ୍ତେ କମିଟି ପ୍ରସ୍ତାବ ଦେଇଛି। ସେହିଭଳି ପ୍ରତି ବ୍ଲକରେ ଗୋଟିଏ ଲେଖାଏ ଅଗ୍ନିଶମ ସେବାକେନ୍ଦ୍ର ପାଇଁ ସରକାର ଅନୁମୋଦନ କରିଛନ୍ତି। ଅପରପକ୍ଷରେ କେନ୍ଦ୍ର ଖୋଲିବା ପାଇଁ ଦୂରତାକୁ ମଧ୍ୟ ବୈଶିଷ୍ଟ୍ୟ ରୂପେ ନେବା ଲାଗି ପ୍ରସ୍ତାବ ଦିଆଯାଇଛି। ଭିଆଇପି କାରକେଡ୍କୁ ଅଗ୍ନିସୁରକ୍ଷା ଲାଗି ଏସ୍ୟୁଭି ଗାଡି ପାଇଁ ଅର୍ଥ ପ୍ରଦାନ ସହ ମାନବ ସମ୍ବଳର ଆବଶ୍ୟକତାକୁ ପୂରଣ କରିବାକୁ ସୁପାରିସ କରାଯାଇଛି। ମେରାଇନ୍ ଥାନାକୁ ଅତ୍ୟାଧୁନିକ କରିବା ସହ ଆବଶ୍ୟକ ଆଧୁନିକ ସାମଗ୍ରୀ ଯୋଗାଇବା ଲାଗି କମିଟି ପ୍ରସ୍ତାବ ରଖିଛି।