ବମ୍ବେ: ଦୀର୍ଘ ଛଅ ବର୍ଷରୁ ଅଧିକ ସମୟ ସୁଶାନ୍ତ ସିଂ ରାଜପୁତଙ୍କ ସହ ସମ୍ପର୍କରେ ଥିଲେ ଅଭିନେତ୍ରୀ ଅଙ୍କିତା ଲୋଖଣ୍ଡେ। କୌଣସି କାରଣକୁ ନେଇ ଉଭୟ ଅଲଗା ହେବାକୁ ସ୍ଥିର କରିଥିଲେ। ଉଭୟ ଉଭୟଙ୍କୁ ସମ୍ମାନ ଜଣାଇ କେହି କାହା ସମ୍ପର୍କରେ ରହି ନ ଥିଲେ। ଏହାକୁ ଚାରି ବର୍ଷ ବିତିଥିବା ବେଳେ ହଠାତ ସୁଶାନ୍ତଙ୍କ ମୃତ୍ୟୁ ଖବରକୁ ଗ୍ରହଣ କରିପାରି ନ ଥିଲେ ଅଙ୍କିତା। ଘଟଣାକୁ ବିଶ୍ୱାସ କରିବାକୁ ତାଙ୍କୁ ଏକ ମାସରୁ ଅଧିକ ସମୟ ଲାଗିଲା। ଏବେ ସେ ଜାତୀୟ ଗଣମାଧ୍ୟମରେ ସାକ୍ଷାତକାର ଦେଇ ସୁଶାନ୍ତଙ୍କ ମୃତ୍ୟୁ ପଛର କାରଣ ଜାଣିବାକୁ ଚାହୁଁଥିବା ପ୍ରକାଶ କରିଛନ୍ତି।
ସାକ୍ଷାତକାରରେ ଅଙ୍କିତା କହିଥିଲେ ସୁଶାନ୍ତ ଜୀବନକୁ ଭଲ ପାଉଥିବା ଜଣେ ଯୁବକ ଥିଲେ। ଏଣୁ ସେ ଆତ୍ମହତ୍ୟା କରିଥିବା ଘଟଣାକୁ ସ୍ବିକାର କରିହେଉନାହିଁ। ଯଦି ବି ସେ ଆତ୍ମହତ୍ୟା କରିଛନ୍ତି ତେବେ ଏହାର କାରଣ ଜାଣିବାକୁ ଚାହିଁବି। କାରଣ ସାମାନ୍ୟ କାରଣକୁ ନେଇ ସେ ଏଭଳି ପଦକ୍ଷେପ ଗ୍ରହଣ କରିବା ପିଲା ନ ଥିଲେ। ଅଙ୍କିତାଙ୍କ ଏହି କଥା ଏବେ ଗଣମାଧ୍ୟମର ଶିରୋନାମା ପାଲଟିଛି। ଅପରପକ୍ଷେ ଏଭଳି କଥା କହିବା ପରେ ଅଙ୍କିତାଙ୍କୁ ସତର୍କ ରହିବାର ଆବଶ୍ୟକତା ଅଛି ବୋଲି ନିର୍ଦ୍ଦେଶକ ବିବେକ ଅଗ୍ନିହୋତ୍ରୀ କହିଛନ୍ତି।
ବିବେକ ଏକ ଟୁଇଟ୍ କରି କହିଛନ୍ତି, ସୁଶାନ୍ତ ପ୍ରକୃତରେ ଅବସାଦଗ୍ରସ୍ତ ନ ଥିଲେ। ଲୋକମାନେ ତାଙ୍କୁ ବୁଝିବାରେ ଭୁଲ କରୁଛନ୍ତି। କାରଣ ସାଧାରଣ ଲୋକ ଅସାଧାରଣ ଲୋକଙ୍କୁ ବୁଝିପାରିବେ ନାହିଁ। ସାବାସ୍ ଅଙ୍କିତା। ହେଲେ ନିଜର ଧ୍ୟାନ ରଖ। ଏବେ ସେମାନେ ତୁମ ପଛରେ ପଡ଼ିଯିବେ। ଭଗବାନ ତୁମକୁ ଶକ୍ତି ଦିଅନ୍ତୁ ବୋଲି ସେ କହିଛନ୍ତି।