ବଇଣ୍ଡା,୧୭।୪(ଡି.ଏନ.ଏ.)- ଗ୍ରାମାଞ୍ଚଳବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ସରକାର ଜଳ ଯୋଗାଣ ପ୍ରକଳ୍ପ ନିର୍ମାଣ କରୁଛନ୍ତି। ହେଲେ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ବହୁ ପ୍ରକଳ୍ପ ଅଚଳ ହୋଇପଡ଼ିଥିଲେ ବି ସେଗୁଡ଼ିକର ମରାମତି କରାଯାଉ ନାହିଁ। ବର୍ତ୍ତମାନ ଗ୍ରୀଷ୍ମଋତୁରେ ଅଧିକ ଜଳର ଆବଶ୍ୟକତା ଥିବାବେଳେ ଏପରି ଅଚଳ ପ୍ରକଳ୍ପ ଲୋକଙ୍କ ପାଇଁ ବଡ଼ ସମସ୍ୟା ସୃଷ୍ଟି କରୁଛି। ସେମାନେ ବିଶୁଦ୍ଧ ପାନୀୟ ଜଳ ପାଇଁ ଡହଳ ବିକଳ ହେଉଛନ୍ତି। ଆଠମଲ୍ଲିକ ବ୍ଲକ ଆମ୍ବଶରମୁଣ୍ଡା ପଞ୍ଚାୟତ ତାଳମଳିହା ଗ୍ରାମରେ ଏପରି ପରିସ୍ଥିତି ସୃଷ୍ଟି ହୋଇଛି। ଏଠାକାର ପ୍ରକଳ୍ପରେ ଲାଗିଥିବା ପମ୍ପ ଅଚଳ ହୋଇଯାଇଛି। ବାରମ୍ବାର ଅଭିଯୋଗ ସତ୍ତ୍ୱେ ଏହାକୁ ମରାମତି କରାଯାଉ ନ ଥିବା ଯୋଗୁ ଏକ ସପ୍ତାହରୁ ଊର୍ଦ୍ଧ୍ୱ ହେବ ଜଳ ଯୋଗାଣ ବନ୍ଦ ରହିଛି।
ଗ୍ରାମବାସୀଙ୍କ କହିବା ଅନୁଯାୟୀ, ୨୦୦୭ରେ ତାଳମଳିହାଠାରେ ସରକାରଙ୍କ ପକ୍ଷରୁ ୭ ଲକ୍ଷ ଟଙ୍କା ବ୍ୟୟରେ ଜଳଯୋଗାଣ ପ୍ରକଳ୍ପ ନିର୍ମାଣ କରାଯାଇ ୨ଶହ ପରିବାରକୁ ପାଣି ଯୋଗାଇ ଦିଆଯାଉଥିଲା। ହେଲେ ଅତି ନିମ୍ନମାନର ଯନ୍ତ୍ରାଂଶ ଯୋଗୁ ପ୍ରକଳ୍ପଟି ବାରମ୍ବାର ଅଚଳ ହୋଇପଡ଼ୁଛି। ପୂର୍ବରୁ ୨ ଥର ପମ୍ପ ଅଚଳ ହୋଇଯାଇଥିବାରୁ ଏକ ନୂତନ ପମ୍ପ ଲଗାଇବା ପାଇଁ ଗ୍ରାମବାସୀ ବହୁବାର ଆଠମଲ୍ଲିକ ଜଳ ଯୋଗାଣ ବିଭାଗରେ ଅଭିଯୋଗ କରିଥିଲେ ମଧ୍ୟ କେହି ଶୁଣୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମରେ ୨ଟି ନଳକୂପ ଥିଲେ ବି ଜଳସ୍ତର ହ୍ରାସ କାରଣରୁ ପର୍ଯ୍ୟାପ୍ତ ପାଣି ମିଳିପାରୁ ନାହିଁ। ବାଧ୍ୟ ହୋଇ ଲୋକେ ଅଧ କିମି ଦୂରରେ ଥିବା ଏକ ଖୋଲା କୂଅରୁ ପାଣି ଆଣି ବ୍ୟବହାର କରୁଛନ୍ତି। ତୁରନ୍ତ ଏକ ନୂତନ ପମ୍ପ ଲଗାଇ ଜଳ ଯୋଗାଣ କରା ନ ଗଲେ ଆନ୍ଦୋଳନ କରାଯିବ ବୋଲି ଗୋଲଖ ଚନ୍ଦ୍ର ସାହୁ, କ୍ଷୀରୋଦ ସାହୁ, ତ୍ରିଲୋଚନ ପ୍ରଧାନ, ସୁରେଶ ପ୍ରଧାନ, ସପ୍ନେଶ୍ୱର ସାହୁ, କୀର୍ତ୍ତନ ମାଝି, ତ୍ରିଲୋଚନ ପ୍ରଧାନ ପ୍ରମୁଖ ଚେତାବୀନୀ ଦେଇଛନ୍ତି। ଏ ନେଇ ଆମ୍ବଶରମୁଣ୍ଡା ସରପଞ୍ଚ ମହେଶ୍ୱର ଦେହୁରି କହିଛନ୍ତି, ପମ୍ପ ଅଚଳ ଯୋଗୁ ଜଳ ଯୋଗାଣ ବନ୍ଦ ରହିଛି। ପାଣି ପାଇଁ ଲୋକେ ବହୁ ହୀନସ୍ତା ହେଉଥିବାରୁ ଯଥାଶୀଘ୍ର ଏକ ନୂତନ ପମ୍ପ ଲଗାଇବା ପାଇଁ ଆଠମଲ୍ଲିକ ଜଳ ଯୋଗାଣ ବିଭାଗ କନିଷ୍ଠ ଯନ୍ତ୍ରୀଙ୍କୁ ଅବଗତ କରାଯାଇଛି। କନିଷ୍ଠ ଯନ୍ତ୍ରୀ ଉମାକାନ୍ତ ବେହେରା କହିଛନ୍ତି, କର୍ମଚାରୀ ଅଭାବ ଯୋଗୁ ମରାମତି କାର୍ଯ୍ୟ ହୋଇପାରୁ ନାହିଁ।