ଭୁବନେଶ୍ୱର,୧୫ା୮(ବ୍ୟୁରୋ): ମାଲେସିଆର ଏକ ପଣ୍ୟବାହୀ ଜାହାଜ ଅଚଳ ହୋଇପଡିବାରୁ ପୁରୀ ଜିଲା କୃଷ୍ଣପ୍ରସାଦ ବ୍ଲକ୍ ଅନ୍ତର୍ଗତ ଚିଲିକା ମୁହାଣର ରାଜହଂସ ଓ ଖିରିସାହି ଗାଁ ନିକଟ ବଙ୍ଗୋପସାଗର ଉପକୂଳରେ ୮ଦିନ ହେବ ଅଟକି ରହିଛି। ଏବେ ଏଥିରୁ ତେଲ ଲିକ୍ ହେବା ଆଶଙ୍କା ଦେଖାଦେଇଛି। ତେଣୁ ତୁରନ୍ତ ଉକ୍ତ ସ୍ଥାନରୁ ଜାହାଜଟିକୁ ହଟାଇବାକୁ ଗୁରୁତ୍ୱ ଦେଇଛି ଭାରତୀୟ ତଟରକ୍ଷୀ ବାହିନୀ। ଏନେଇ ବୁଧବାର ସମ୍ପୃକ୍ତ ଜାହାଜ କମ୍ପାନୀକୁ ଚିଠି ଲେଖି ଅବଗତ କରାଯାଇଛି।
ଭାରତୀୟ ତଟରକ୍ଷୀ ପକ୍ଷରୁ ମିଳିଥିବା ସୂଚନାନୁସାରେ, ମାଲେସିଆସ୍ଥିତ ‘ଟଗ୍ ଜିନ୍ ହ୍ୱା’ କମ୍ପାନୀର ଏହି ଜାହାଜରେ ବିପୁଳ ପରିମାଣର ତେଲ ରହିଛି। ୩୦ ହଜାର ଲିଟର ଡିଜେଲ ଥିବାବେଳେ ଜାହାଜରେ ୧୦୦୦ ଲିଟର ଲ୍ୟୁବ୍ ଅଏଲ ଏବଂ ୨୦୦ ଲିଟର ହାଇଡ୍ରୋଲିକ୍ ଅଏଲ ମଧ୍ୟ ଠୁଳ ହୋଇ ରହିଛି। ବର୍ତ୍ତମାନ ରାଜ୍ୟରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ସକ୍ରିୟ ଥିବାରୁ ପବନ ମାଡ଼ରେ ଜାହାଜ କ୍ଷତିଗ୍ରସ୍ତ ହୋଇ ତେଲ ଲିକ୍ ହେବା ଆଶଙ୍କା କରାଯାଉଛି। ତେଲ ଲିକ୍ ହେଲେ ମୁହାଣ ଦେଇ ଚିଲିକା ଜଳରେ ମିଶିବ। ଏହାଦ୍ୱାରା ଚିଲିକାର ଜୈବ ବିବିଧତା ଉପରେ ଏହାର ଭୟଙ୍କର ପ୍ରଭାବ ପଡ଼ିବ। ଚିଲିକା ଜଳ ବିଷାକ୍ତ ହେବାସହ ଶତାଧିକ ପ୍ରଜାତିର ଜଳଜୀବ ଏବଂ ବିରଳ ଇରାଓ୍ବାଡ଼ି ଡଲ୍ଫିନ୍ଙ୍କୁ ଏହା ବିଶେଷ କ୍ଷତି ପହଞ୍ଚାଇବ ବୋଲି ଆଶଙ୍କା କରାଯାଉଛି। ଏପରିକି ଚିଲିକାର ପ୍ରାକୃତିକ ପରିବେଶକୁ ଏହା ନଷ୍ଟ କରିପାରେ ବୋଲି ତଟରକ୍ଷୀ ବାହିନୀ ପକ୍ଷରୁ କୁହାଯାଇଛି। ଏହାକୁ ଦୃଷ୍ଟିରେ ରଖି ଜାହାଜରୁ ତେଲ ଲିକ୍ ଯେପରି ନ ହେବ ସେଥିଲାଗି ତୁରନ୍ତ ପଦକ୍ଷେପ ନେବାକୁ ଚିଠିରେ ନିର୍ଦ୍ଦେଶ ଦିଆଯାଇଛି।