ପାଟକୁରା, ୨ା୬(ଡ଼ି.ଏନ.ଏ.)-କେନ୍ଦ୍ରାପଡା ଜିଲା ପାଟକୁରା ଥାନା ଅନ୍ତର୍ଗତ ପଳସୁଧା ପଞ୍ଚାୟତ ନିକଟ ପାଇକା ନଦୀର ପଥର ବୁରୁଜ ନିକଟରେ ଶୁକ୍ରବାର ରାତିରେ ଜଣେ ଭିନ୍ନକ୍ଷମ ଯୁବକଙ୍କୁ ହତ୍ୟା କରାଯାଇଛି । ବର୍ତ୍ତମାନ ସୁଦ୍ଧା ତାଙ୍କର ପରିଚୟ ମିଳିନାହିଁ । ସ୍ଥାନୀୟ ପୋଲିସ ଶନିବାର ମୃତଦେହ ଜବତ କରି ବ୍ୟବଚ୍ଚେଦ ପାଇଁ ପଠାଇବା ସହ ଏ ନେଇ ଏକ ମାମଲା ରୁଜୁ କରିଛି । କେସ ନଂ ୧୪୧/୧୯।
ପ୍ରକାଶ ଯେ, ରାତି ପ୍ରାୟ ୧୧ଟାରେ ଦୁଇଟି ବାଇକ୍ରେ ଦୁର୍ବୃତ୍ତମାନେ ଆସି ନଦୀବନ୍ଧରେ ବାଇକ ରଖିବା ସହ ନିକଟସ୍ଥ ପଥର ବୁରୁଜ ଉପରକୁ ଯାଇଥିଲେ । ଏହାର କିଛି ସମୟ ପରେ ସେମାନେ ଜଣେ ଯୁବକଙ୍କୁ ଠେଙ୍ଗାରେ ନିସ୍ତୁକ ପିଟିଥିଲେ । ଏହି ସମୟରେ ବୁରୁଜ ଠାରୁ ଅଳ୍ପ ଦୂରରେ ନଦୀ ଆରପାରି ବାଲିରେ ମତଗଜପୁର ଗ୍ରାମର କେତେଜଣ ବ୍ୟକ୍ତି ଶୌଚ ହେବାକୁ ଆସି ସଂପୃକ୍ତ ଯୁବକଙ୍କ ଚିତ୍କାର ଶୁଣିଥିଲେ । ସେମାନେ ଏଭଳି ଘଟଣା ଦେଖି ଭୟଭୀତ ହୋଇ ଗ୍ରାମକୁ ଦୌଡିଯାଇ ଅନ୍ୟମାନଙ୍କୁ ଏ ସଂପର୍କରେ କହିଥିଲେ । ମତଗଜପୁର ଗ୍ରାମବାସୀ ପଳସୁଧା ସରପଞ୍ଚ ଅନୁଜ ମହାନ୍ତିକୁ ଫୋନ କରି ଏହା ଜଣାଇଥିଲେ । ପରେ ଉଭୟ ଗ୍ରାମର ଲୋକେ ଘଟଣାସ୍ଥଳକୁ ଯାଇଥିଲେ । ଖବରପାଇ ପୋଲିସ ପହଞ୍ଚତ୍ ବୁରୁଜ ପାଖ ପଥର ତଳୁ ଚାପି ହୋଇ ରହିଥିବା ଯୁବକଙ୍କ ମୃତଦେହ ଉଦ୍ଧାର କରିଥିଲା । କିନ୍ତୁ ସେତେବେଳକୁ ଦୁର୍ବୃତ୍ତମାନେ ଆସିଥିବା ୨ଟି ବାଇକରେ ଫେରାର ହୋଇ ଯାଇଥିଲେ । ରାତିରେ ପୋଲିସ ମୃତଦେହ ଜଗି ରହିଲା । ଶନିବାର ସାଇଣ୍ଟିଫିକ୍ ଟିମ୍ ସହ ପାଟକୁରା ଥାନା ଆଇଆଇସି ସୁଜିତ ପ୍ରଧାନ ଓ କୋରୁଆ ଫାଣ୍ଡି ଅଧିକାରୀ ମହମ୍ମଦ ଜାମସେଦ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲେ । ମୃତକଙ୍କ ନିକଟରୁ ଏକ ଠେଙ୍ଗା ଓ ତାଙ୍କ ପକେଟରୁ ୨୫ ଟଙ୍କା ଜବତ ହୋଇଛି । ତାଙ୍କ ବାମ ଗୋଡ ପୋଲିଓ ଆକ୍ରାନ୍ତ ବୋଲି ଜଣାପଡିଛି ା ସେ ସଂଖ୍ୟାଲଘୁ ସଂପ୍ରଦାୟର ବୋଲି ପୋଲିସ ସନ୍ଦେହ କରୁଛି । ତାଙ୍କୁ ଅତି ବିଭତ୍ସ ଭାବରେ ପିଟି ପିଟି ପଥରରେ ଛେଚି ହତ୍ୟା କରାଯାଇଥିବା ପାରିପାର୍ଶ୍ୱିକ ସ୍ଥିତିରୁ ଜଣାପଡୁଛି । କେଉଁ କାରଣ ପାଇଁ ଏଭଳି ଘଟିଲା ଓ ଭିନ୍ନକ୍ଷମ ଯୁବକଙ୍କର ଦୁର୍ବୃତ୍ତଙ୍କ ସହିତ ପୂର୍ବରୁ ପରିଚୟ ଥିଲା କି ନାହିଁ ପୋଲିସ ତଦନ୍ତ ଚଳାଇଛି ।
ପ୍ରକାଶ ଥାଉ କି, ୨୦୧୬ ଡିସେମ୍ବର ୨୮ ତାରିଖରେ ଏହି ପଥର ସ୍ପର ନିକଟରୁ ଜଣେ ଅଚିହ୍ନା ଯୁବକଙ୍କ ଗଳିତ ମୃତହେଦ ମିଳିଥିଲା । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା ା ସେତେବେଳେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ସାଧାରଣରେ ଆଲୋଚନା ଜୋର ଧରିଥିଲା । କିନ୍ତୁ ସେହି ଘଟଣାର ଆଜି ପର୍ଯ୍ୟନ୍ତ ତଦନ୍ତ ସରିନାହିଁ । ଏବେ ବି ଉକ୍ତ ଘଟଣା ସନ୍ଦେହ ଘେରରେ ରହିଛି । ଜଗତସିଂହପୁର ଜିଲାର କ୍ରିଷ୍ଣାନନ୍ଦପୁର ଓ କେନ୍ଦ୍ରାପଡା ଜିଲାର ତେଣ୍ଡାକୁଡା ପାଇକା ନଦୀର ଦୁଇପାର୍ଶ୍ୱରେ ଅବସ୍ଥିତ । ଏହି ଇଲାକା ଅପରାଧୀ ଜୋନ ଭାବରେ ପୋଲିସ ରେକର୍ଡରେ ରହିଛି ।